Diferente, iha eleisaun prezidensial eleitor sira tau stiker iha kartaun eleitoral molok ba tuir votasaun, maibe ba eleisaun Parlamentar sei la uza, tanba tuir Sekretariadu Tekniku Administrasaun (STAE) nia hare, sistema ne’e ladun efetivu.
“Laiha valor no ladun efetivu uza sistema ne’e,” hateten Adjuntu STAE, Manuel Branco, (05/06), iha Kaikoli, Dili.
Tuir nia, STAE sei uza maneira seluk e agora prepara hela, oinsa para eleitores sira bele hatene, sira tenke vota iha ne’ebe.
“ita uza maneira seluk hanesan ezekusaun mudansa, katak ita tau naran iha lista no taka iha sede suku nia fatin, para eleitores ida-idak bele ba verifika sira nia naran,” dehan Adjuntu Branco.
Entertantu tuir Membru Parlamentu Nasional, Deputada Fernanda Lay, katak tau stiker iha kartaun eleitoral laiha vantajen diak ida.
“Iha eleisaun prezidensial primeiru ronde ne’e, sira tau stiker karik tanba iha eleitores balun truka naran no vota dala rua, maibe iha eleisaun parlamentar hau hanoin la presiza, komunidade lubuk ida mak muda ona sira nia kartaun,” Deputada ne’e dehan.
