Kareta bis tolu (3) ne’ebe Ministeriu Edukasaun (ME) sosa ba Estudante Fakuldade Enjenaria iha Universidade Nasional Timor Lorosa’e (UNTL) iha tinan kotuk, agora para deit no la uza tanba kazu ba bis rasik iha ona Ministeriu Publiku atu halo investigasaun.
“Ita bo’ot sira hare bis ne’e para to’o atu sai aat ona, e bis rua seluk lahatene nia paraderu iha ne’ebe,” hateten Administrador UNTL Mateus Fernandes, semana kotuk, iha Kampus UNTL, Dili.
Tuir nia, bis tolu ne’e diskunfia ME sosa husi segundu maun (uzadu) ne’ebe agora iha MP, to’o agora seidauk hatene nia rezultadu.
“Atu dehan katak ida ne’e hanesan ita estraga sasan estadu, tanba ita hare kuaze tinan ida liu tiha ona mais prosesu ida ne’e nunka mais la’o to’o agora,” Administrador Fernandes kestiona.
Parte UNTL rasik agora sosa tan bis rua husi Indonezia hodi tula estudante enjenaria sira ba eskola iha Hera, “bis ida mai tiha ona e ida seluk seidauk mai,” Administrador ne’e dehan.
Entertantu Vise Prezidente Komisaun F Parlamentar, Deputadu Francisco Jeronimo husu ba MP atu prosesa kazu ne’e ba oin.
“Tuir lolos uluk sosa kareta hat, la’os tolu deit maibe sira ba sosa, balun sosa fali kamioneta, entaun sosa fali bis e bis ne’e mos segundu maun,”Deputadu Jeronimo tenik.
Entertantu TDW koko konfirma asuntu ne’e ba iha Ministeriu Publiku, maibe Sekretaris Prokuradoria da Republika nian ne’ebe la fo sai ninia naran, hateten sira lakohi fo informasaun ne’e ba iha publiku.
“Ami husi ministeriu publiku labele fo sai informasaun konaba ida ne’e tanba ne’e segredu,”dehan fonts konfirmadu ne’e.
