“Ami bai-bain fa’an iha ne’e wainhira ami presiza atu ba soe bee ruma, defisil ba ami atu ba soe, situasaun obriga ami tenke ba ai hun kuak bo’ot ne’eba mak ami foin bele soe bee,” hateten Negosiante Roda Tolu Eldito Freitas, (25/05), iha Dili.
Negosiante ne’e senti triste, tanba Governu fakar osan halo tiha haris fatin iha tasi ibun, maibe to’o agora husik abandona tanba bee la iha.
Entertantu Membru Komisaun G Parlamentar, Deputadu Pedro da Costa dehan, toilet ne’e husik abandona tanba ministeriu kompetente ne’ebe halo buat ne’e la ho estudu viabilidade.
“Tuir ami nia observasaun iha faktor tolu mak influensia, infrastrutura de apoiu ne’e ita halo tiha la iha bee, infrastrutura sira ne’e ita halo tiha maibe la iha ema atu kuidadu, e ida seluk tan mak ita hanesan populasaun iha sidade Dili ne’e seidauk iha konsiensia atu konserva buat ne’ebe diak ba ita,” dehan Deputadu da Costa.
Tanba ne’e mak nia sujere ba iha Governu, liu liu ministeriu kompetente atu hare ba nia sustentabilidade haruka ema tenki taumatan ba fatin ne’e, no mos dada bee ba iha fatin ne’e atu nune’e fatin sira ne’e labele husik abandona deit.
Iha fatin hanesan Deputadu Mario Viegas Carrascalao katak, ho abandonadu TP ne’e, katak governu halo investe osan saugati deit.
“Hau sei lembra tempu Portugues nian,sira halo toilet ida iha Merkadu lama ne’e, tanba la tau ema ida kontrola iha neba hodi hare, la liu fulan ida hanesan ne’e, sintina ne’e fatuk mak tama nakonu iha neba,” Deputadu Carrascalao dehan.
Entretantu bainhira TDW koko konfirma asuntu ne’e ba iiha Administrador Distritu Dili, Gaspar Soares, maibe nia lakohi fo komentariu tanba nia rasik la hatene prezensa Toilet Publiku ne’e.
“Hau seidauk hatene Toilet Publiku iha Tasi ibun ne’e,” dehan Administrador Soares.
