Hafoin akontesementu ne’e Sekretariu Estadu Formasaun Profesional e Empregu (SEFOPE) bolu imediata Empreza Hotel Timor no Sindikatu sira, atu halo negosiasaun ida ne’ebe diak, hodi fo kompesesaun ba trabalhadores sira no sira mos hetan oportunidade atu hala’o servisu hanesan bai-bain.
“Hau hanoin katak empreza mos kolabora positive tebes, nune’e mos ita nia trabalhadores sira mos kolabora diak tebes foti solusaun ita rezolve, importante tebes asaun sira hanesan ne’e presiza hare diak liu tan, ita nia situasaun trabalho liu-liu direitu trabalhadores,” dehan SE Bendito Freitas, (24/05), iha Salaun Enkontru SEFOPE Kaikoli, Dili.
Iha prosesu negosiasaun ne’ebe SEFOPE halo ho Empreza HT, katak kada trabalhadores ida hetan kompensasaun ho montante mil kinentus (1.500) dolares Amerikanu, no trabalhadores sira mos simu osan seis mil dolares Amerikanu.
Iha oportunidade ne’e Empreza HT mos husu ba Sindikatu sira atu tau matan ba trabalhadores sira ne’ebe halo servisu iha Hotel Timor ne’e.
Tuir SE Freitas, intervensaun SEFOPE nudar Instituisaun governu ne’ebe toma atensaun ba trabalhadores sira e importante tebes ba kazu disputa laboral hanesan akontese iha Banku Mandiri no seluk tan.
Iha oportunidade hanesan Prezidente SJTL Helino, sente kontente tanba problema ne’e bele resolve ho diak no trabalhadores sira bele fila fali ba hala’o sira nia servisu hanesan bai-bain.
“Ami iha akordu ida ho Emprezariu HT ne’ebe fasilita husi Sekretariu Estadu, Bendito Freitas hetan ona akordu konkordansia katak sira na’in hat hahu aban bele fila fali hala’o servisu ne’e mak importante,” dehan Prezidente SJTL Helino.
