“Ohin ofisialmente ami deklara, salario minimu nasional mak $115 dolar Amerikanu, ne’ebe ekivalente mos ho salario Nivel 1 Funsaun Publiku no sei aplika durante tinan 2 husi komisaun nasional salario minimu,” dehan SE Bendito Freitas (24/05) iha Salaun Enkontru SEFOPE Kaikoli, Dili.
Tuir SE Freitas, Emprezariu sira prontu atu implementa deklarasaun ne’e, tanba durante hala’o peskiza no diskusaun sira mos partisipa ho ativu.
Nia hatutan, parte KNSM sei halo sosializasaun informasaun ba trabalhadores no emprezario sira, atu sira mos bele hatene nune’e labele iha separasaun ne’ebe bo’ot liu kona ba direitu trabalhadores.
Iha parte seluk Reprezentantes Emprezas, Francisco da Costa Cabral Lay, hateten nudar Emprezario Nasional tenke simu determinasaun salario ne’e, tanba ne’e atu hadia kualidade Timor oan no la’os ba tempu badak, iha futuru sei halo revizaun ba implementasaun ne’ebe iha.
“Hau sente nudar emprezario nasional ita tenke simu atu dezenvolve ita nia rai, hotu-hotu tenke halo tuir hanesan loza sira ou servisu saida deit ne’e tenke selu ba ita nia trabalhadores sira minimal $115,” dehan Emprezariu Lay.
Iha lidun seluk tuir Prezidente Sindikatu Jeral Trabalhadores Timor-Leste (SJTL) Helino katak desizaun ne’e diak tebes tanba uluk salario minimu $80, agora sae ba $115 dolar fulan ida maibe importante mak hare ba implementasaun ne’e responde ba nesesidade trabalhadores sira nian lor-loron.
