“Tuir Primeiru Ministru nia ideias atu halo klinika join ida iha Naktuka, e hau hanoin ami sei halo, nune’e mos foin dadauk ami halo asina akordu ho governador Indonezia atu estabelese klinika iha perbatasan atu bele halo prevensaun, tanba ita labele bandu fatin prostituisaun sira ne’e,” hateten Ministru Saude, Dr. Nelson Martins, (15/05) iha Centru Convensaun Dili.
Tuir nia, maske nune’e MS tau ona pesoal saúde ida iha perbatasan, cek pasajeirus sira ne’ebe tama mai Timor nune’e mos koperasaun servisu entre ospital sira hanesan ospital Atambua ho Suai, Maumere ho Maliana nune’e mos kupan ho Oecuse atu kapasita malu hodi bele prevene tanba edukasaun seksual importante tebes ba Timor-Leste.
Ministru Martins dehan, moras ne’ebe hadaet liu husi transmisaun ran ne’ebe perigozu tebes ne’e la’os HIV/SIDA deit, maibe mos moras Hepatitis B ne’ebe agora barak ona iha Timor-Leste.
Tanba ne’e ministerio sei kontinua halo sosializasaun no ezaminasaun ba moras sira ne’e, liu husi programa SISKA hodi sai tama suku maibe seidauk to’o importante liu sai tama eskola atu fo edukasaun seksual no informasaun klean konaba moras perigozu sira ne’e ba estudantes sira.
“Ita nudar nasaun foun ita tenke orgulho tanba estado iha kapasidade atu akompania moras sira ne’e no ita iha aimoruk ba HIV/SIDA hanesan Anti retroviral (ARV) ne’ebe nasaun seluk atu sosa maibe susar maske labele kura maibe bele prolonga ema nia vida moris no ita iha VCT iha sentru saúde hotu,” dehan Ministru Martins.
Iha oportunidade hanesan Membru Parlamentu Nasional, Deputadu Domingos Mesquita hateten, planu ne’e positive tebes tanba area fronteira ne’e risku ba virus transmisaun HIV/SIDA , tanba iha parte ne’eba liu-liu Atambua, prostituisaun buras e presiza duni estabelese klinika atu bele cek ema ne’ebe sai tama bele lori mos moras hadaet sira ne’e mai Timor.
