Rekursu humanu, kualidade Ospital no Sentru Saude iha teritoriu tomak inklui abilidade pesoal saude ne’ebe sei minimu, sai fator impedementu ba Ministeriu Saude (MS) atu atinji povu hotu moris ho saudavel, tanba ne’e iha 2012 to’o 2017, minsteriu sei tau prioridade ba kestaun hirak ne’e, liu-liu halo investimentu ba espesialista nian.
“Ita sei hola ekipamentus hodi moderniza ita nia ekipamentus medikus sira no ita sei investe ba espesialista atu bele servi rasik povu Timor-Leste, inklui hadia kualidade ospital no sentru saude sira,” dehan Ministru Saúde, Nelson Martins, semana kotuk (15/05), bainhira halo aprezentasaun kona ba dezenvolvimentu iha setor saúde ba parseirus dezenvolvementu, iha Sentru Convensaun Dili.
Tuir Ministru, durante iha mandatu Governu Aliansa Maioria Parlamentar (AMP), dezenvolvementu iha setor saúde iha buat barak mak resolve hotu, maibe avansadu.
“Durante hau simu mandatu nudar ministru saúde, hau la’o haleu iha teritorio tomak identifika iha dezafiu barak hanesan, komunidade iha area rurais difisil asesu ba fasilidade saúde, sentru saúde sira sei falta rekursu umanu, eletrisidade, bee mos, maibe balun konsege resolve ona hanesan komunidade rurais asesu ona ba fasilidade saúde liu husi programa Servisu Integrado Saúde Komunitaria (SISKA) ne’ebe halao fulan ida dala ida, no iha sentru saúde iha ona uma maternidade kompletu ho bee moos no eletrisidade, nune’e mos mediku Timoroan rasik mak kaer,” Ministru Martins dehan.
Atu responde kona ba falta rekursu umanu iha sentru saude sira, governu estabelese ona Sentru Formasaun ba Pesoal Saúde iha Universidade Nasional Timor-Lorosa’e (UNTL).
Ministru Martins afirma, iha 2013 sei estabelese 300 postu saúde iha teritorio tomak, inklui alozamentu ba parteiras, emfermeirus no mediku sira ne’ebe atu fo asistensia ba komunidade sira ho diak liu tan.
Entretantu Membru Komisaun F Parlamentar, Deputadu Domingos Mesquita, rekonese katak iha buat balun MS resolve ona maibe balun mos presiza atu hadiak liu tan iha futuro.
“Ami rekonese duni katak iha difikuldade balun mak ministerio rezolve ona, maibe presiza tau atensaun hanesan fasilidade iha sentru saúde (kamas, ambulansia) no harii klinika iha area rurais, inklui mos sistema distribuisaun aimoruk tanba ida ne’e mak failansu ne’ebe durante ne’e ministeriu hasoru,” dehan Deputadu Mesquita.
Nia parte konkorda ho planu MS nian atu investe maka’as espesialista sira iha futuru, tanba durante ne’e moras barak mak halo transferensia ba liur.
