Ho aumenta numeru trabalho infantile iha Timor-Leste, liu-liu fase kareta iha estrada ibun, no atu prevene Organizasaun Non Governmentais (ONG) Forum Komunikasaun Juventude (FCJ) husu ba taxista sira labele uza labarik sira, hodi fase sira nia kareta.
“Polisia tranzitu tenke fo edukasaun ba taxista sira atu labele fo taxi ba labarik sira fase, se ema sira ne’e mak iha duni konsiensia, laiha ema ida fo sira nia taxi ba labarik sira fase fasil atu redus trabalho infantil tanba laiha aktividade labarik komesa baruk ona,” dehan Diretor FCJ, de Oliveira, semana kotuk (04/05) iha nia knar fatin Balide, Dili.
Tuir nia, fatin ne’ebe dalabarak liu labarik sira fase kareta mak hanesan iha Kaikoli no Pantai Kelapa, tanba ne’e husu ba ministeriu kompetente atu taka tiha bee ne’ebe suli iha fatin ne’eba, nune’e taxista sira labele fase kareta.
“Iha Pantai Kelapa laiha ona tanba ema uza tiha torneira, maibe iha Kaikoli bee nunka maran, e labarik sira fase kareta iha ne’eba,” hateten Diretor de Oliveira.
Iha parte seluk Adjuntu Komandante Polisia Tranzitu, Valentine da Silva Soares dehan, sira sempre fo formasaun ba taxista sira bainhira atu hetan karta kondusaun, maibe la’os kona ba uza labarik hodi fase kareta, tanba laiha baze legal ida.
“Ami seidauk iha programa konsola ba taxista sira kona ba labele uza labarik fase kareta, se estadu fo orden ida ou baze legal ida ba ami, nudar polisia atu mantein orden ami prontu halo intervensaun,” dehan Adjuntu da Silva.
Entretantu tuir Taxista ne’ebe lakohi fo sai identidade ba publiku, katak uza labarik hodi fase sira nia kareta tanba sira selu labarik kada taxi ida US$1 ou $1.50 maibe la’os obriga.
“Ami la obriga sira atu fase ami nia taxi, dala ruma ami mai para iha ne’e, ami atu fase maibe labarik sira ne’e husu katak sira presiza osan entau ami haruka sira fase nune’e sira bele hetan osan, tanba osan la’os tur-tur hetan deit maibe tenke servisu nune’e mos labarik,” dehan Taxista ne’e.
