“Agora ami focus atu kontinua ali ami nia programa, atu tau matan ba labarik sira ne’ebe iha sampah liu –liu iha area Tibar nian, kria atividade ruma ba labarik sira atu hatudu kreatividade ruma ne’ebe edukativu no formasaun saúde nian ba labarik sira tanba fatin lexu laos fatin labarik nian hodi halimar ho rajaun fatin risku labarik,” dehan diretur FCJ, Cipriano Freitas de Oliveira, (04/05) iha knar fatin Balide Dili.
Tuir nia, planu ne’e rasik sei implementa iha fulan Junu tinan ne’e, e agora tama ona iha faze avaliasaun ba proposta.
Diretor de Oliveira afirma, kuaze numeru trabalho infantil aumenta, tanba situasaun ekonomia uma laran mak obriga, hanesan hili sasan iha fatin lixu ne’ebe bele hetan osan, maske risku ba sira nia saude.
Nia hatutan, labarik hirak ne’ebe halo servisu iha lixu Tibar ne’e, balun eskola e balun mos la’e tanba ekonomia la suporta.
Iha lidun seluk Komisaun Nasional Direitu Labarik (KNDL), Komisaria Adalgiza Ximenes lakohi fo komentariu kona ba asuntu ne’e, tanba nia parte seidauk hatene objetivu husi planu ne’e.
“Hau labele fo komentariu ba programa ne’e, tanba hau rasik seidauk iha informasaun ruma konaba planu FCJ nian no objetivu principal ba programa ne’e rasik,” dehan Komisaria Ximenes.
