Iha fulan Junho tinan ida ne’e Ministerio Saúde (MS) sei aumenta tan kareta multifunsaun hamutuk 16, atu haforsa liu tan servisu Sentru Saúde sira ne’ebe seidauk iha kareta multifunsaun, nune’e Pesoal Saúde sira uza hala’o programa Servisu Integradu Saúde Komunitaria (SISKA) hodi fo asistensia ba komunidade iha area remota.
“Ami halo kontratu ho kompania Osean mak hola kareta ne’e, e agora dadaun nia prosesu hotu ona, hein deit atu hatama nune’e ami bele pre-enxe hotu iha sentru saúde sira ne’ebe seidauk iha kareta multifunsaun,” hateten Xefe Departamentu Logistica e Gestaun Partrimonio MS, José Francisco de Oliveira Campos, semana kotuk (2/04) iha nia knar fatin Kaikoli, Dili.
Nia esplika, kareta multifunsaun alende Pesoal Saude sira uza hodi hala’o programa SISCA, mos bele tula pasiente ba Sentru Saude ka ospital bainhira Ambulansia laiha, inklui tula aimoruk.
Total kareta multifunsaun ne’ebe agora dadaun halo hela sirkulasaun iha Sentru Saúde 65 iha teritoriu tomak foin iha 50.
Enkuantu Sentru Saúde ne’ebe seidauk iha kareta multifunsaun mak hanesan; Sentru Saúde Becora, Laulara, Wailili,Cailaco, Maliana Vila, Gleno, Fatuberlio, Lautem, no Sentru Saude Tutuala. “Balun iha ona maibe aat ona e presiza troka,” Xefe Campos dehan.
Iha lidun seluk Vise Prezidente Komisaun F Parlamentar, Deputadu Francisco Jeronimo, konkorda ho planu ida ne’e, maibe tenke kontrola mos ba problema kombustivel.
“La’os sosa tiha kareta tau iha ne’eba, kombustivel la iha ikus mai haruka fali familia pasiente buka dalan hodi resolve, ne’e la loos,” tenik Deputado Jeronimo.
