“Ami konvida fasilitador husi 26 partidus, maibe iha deit fasilitador nain 39 husi partidus politiku 17 mak mai partisipa iha formasaun ne’e,” hateten Program Manager Caucus, Paula Corte Real, semana kotuk (03/05) iha Sala Enkontru Fundasaun Alola, Mascarenhas, Dili.
Tuir nia, kada partidus iha ema nain rua feto ida mane ida, sira ne’ebe iha ona konesementu atu fasilita treinamentu ba nia membru sira iha Partidu Politiku.
Formasaun Training Of Trainers (TOT) ne’e ho nia objetivu, atu fasilita fasilitador Parpol sira, bele fo formasaun fali ba sira nia kandidatu feto ne’ebe sei compete iha eleisaun parlamentar nian.
“Nune’e bainhira tur iha parlamentu Nasional bele sai lideransa ne’ebe iha kualidade, no bele halo duni transformasaun ruma ba povu nia moris, liu-liu ba feto sira, tanba dalabarak sosiedade kestiona kona ba kualidade no konesementu feto nia iha vida politika,” Program Manager Corte Real katak.
Materia importante ne’ebe fo iha formasaun ne’e, mak hanesan fo konesementu ba fasilidator sira kona ba lideransa nian, oinsa koalia iha publiku (public speaking) no teknik-teknik kampanha bainhira sira halo kampanha (technical campaign), Manager Corte Real esplika.
Manager Corte Real afirma, Caucus sei fo apoiu orsamentu ho montante US$600 ba kada partidus, nune’e sir abele fo formasaun ba sira nia kandidatu feto ba eleisaun parlamentar nian, enkuantu partidus ne’ebe la partisipa iha treinamentu ne’e, laiha direitu atu hetan apoiu.
Entretantu Fasilitador husi partidu Congresu Nasional Rekonstrusaun Timor (CNRT) ne’ebe partisipa iha formasaun ne’e, Filomena de Oliveira, prontu atu transforma fali material ne’ebe sira hetan ba kandidatu feto iha sira nia partidu laran.
“Nudar fasilitador hau sei halo lobi ho partidu, atu bele hetan apoiu tan orsamentu oituan nune’e ami bele kontinua habelar informasaun ou material ne’ebe ami hetan ba ami nia feto maluk sira ne’ebe tama ona iha lista kandidatura atu bele servi povu ho diak, maibe orsamentu ne’ebe fob a ne’e la sufsiente tanba ami nia partidu bo’ot no ema barak,” dehan Fasilitador de Oliveira.
