Atu membru Polisia Nasional Timor-Leste (PNTL) no Forsa Defeza Timor-Leste (F-FDTL) servisu ho diak liu tan iha future, Xefe Estadu Jose Ramos Horta husu ba governu foun atu hadia sira nia kondisaun.
“Hau hanoin tenke tau prioridade urjenti iha tinan rua ka tolu nia laran, rezolve problema lojistika, infraestrutura no politika salarial iha instituisaun PNTL no F-FDTL nian,” sujere Prezidente Horta, semana kotuk (23/04) iha Distritu Baucau.
Prezidente Horta mos husu ba governu foun atu hare mos kondisaun kuartel sira iha distritu, sub-distritu, inklui mos iha nasional, no fo ekipamentus kompletu hanesan kareta,no radio komunikasaun e mos hadia sira nia hahan iha instituisaun rua ne’e.
Alende ne’e, governu foun mos presiza halo reforma ba iha membru sira ne’ebe ke idade liu ona, nune’e sira bele fila ba uma hodi deskansa.
“Reforma ne’ebe diak, bokur ba sira tanba durante tinan 24 nia laran iha ai laran, e agora tinan 10 ona iha forsas armadas, portantu besik tinan 40 ona e sira iha direitu atu fila ba uma, maibe fila ba uma ho dignidade, ho tulun ne’ebe diak husi estadu,” Xefe Estadu Horta rekomenda.
Tuir nia, iha veteranus lubuk ida mak sai ona husi forsa armadas, maibe sei iha 100 resin mak sei ativu iha forsas, tenke hare urjenti.
Xefe Estadu Horta mos kestiona kona ba osan operasional ba membru PNTL ne’ebe halo operasaun especial simu deit US$ 5 no US$ 6 ba F-FDTL kada loron.
“Ne’e la sufisiente, minimu polisia kuandu halo operasaun especial, devia fo 20 dollar kada loron ida,” Prezidente Horta kestiona.
Maske nune’e Horta fo agradese ba membru PNTL no F-FDTL ne’ebe halo ona sira nia servisu durante tinan lima nia laran ho diak, no disiplina hodi garante seguransa iha rai laran.
Iha parte seluk Membru PNTL Distritu Baucau, Hermelinda Mali rekonese katak, ho osan lima dollar labele halo buat ida.
“Hau sente lima dollar ne’e mos la sufsiente, tan ne’e dala ruma kalan ami tenke ba fali han iha ida-idak nia uma mak mai kontinua fali halo operasaun,” dehan membru Polisia Mali.
