“Katak se mak iha Oecuse, resensiadu iha Oecuse mas nia hela iha Baucau bele vota iha Baucau,” hateten Deputadu Manuel Tilman, semana kotuk, (20/04) iha Uma Fukun, Dili.
Tanba ne’e, tuir Deputadu Tilman, iha tempu badak Parlamentu Nasional bele altera ona lei eleitoral artigu 40 ne’ebe impede ema atu vota iha fatin ne’ebe deit.
Deputadu ne’e dehan, iha eleisaun Parlamentar ne’ebe sei hala’o iha loron 07 fulan Julhu tinan ne’e, sei uza lei eleitoral uluk nian artigu setimu (7).
“Hau hein katak, Prezidenti do Parlamentu bele haruka ba komisaun A halo relatoriu lalais, atu altera artigu balun, loron ida deit ami diskuti tama kedas ba votasaun e final global bele halo hela,” dehan Deputadu Tilman.
Entertantu Deputadu Arao Noe, katak lei eleitoral iha deputadu balun hatama ona sira nia draf atu halo alterasaun ba lei ne’e.
“Eleisaun prezidenti labele ona tanba liu tiha ona, mais Parlamentar hau hanoin ita hare tok se Parlamentu ajenda ba semana oin mai, para bele diskuti e aprova,” Deputadu Noe esperansa.
Tuir Deputadu Noe, alterasaun ba lei ne’e importante tebes, nune’e ema hotu bele ba vota iha eleisaun Parlamentu ninian iha fatin ne’ebe deit.
“Se la’e mandate ne’ebe iha ladun forte e Governu ida ne’ebe forma ladun seguru, ins tabilidade bele akontese, tanba ne’e mak hau hanoin nato’on inisiativa diak ida Parlamentu halo ona para atu halo alterasaun ba lei ne’e,” dehan Deputadu ne’e.
Iha fatin hanesan Deputadu Bankada Fretilin, Francisco Branco dehan, lei eleitoral arrtigu 40 tenke altera, nune’e labele difikulta ba sidadaun hotu-hotu hodi ejersa sira nia direitu.
“Se hotu-hotu konkorda e korum iha para atu halo aprovasaun, la iha impedimentu ida, fasil atu alterasaun,” Deputadu Branco dehan.
