Postu Tranzitu ne’ebe espaila iha capital Dili, oras ne’e dadaun komunidade sira soe foer iha laran hanesan fatin lixu nian, tanba postu sira ne’e mamuk.
Adjuntu Komandante Polisia Tranzitu Nasional, Inspektor Valentino da Silva hateten postu sira ne’e mamuk tanba rekursu la to’o, maibe sira sempre kontrola ba postu hirak ne’e.
“Tanba agora dadaun postu sira ne’e mamuk, maka komunidade sira aproveita atu soe foer, maibe ami mos sempre kontrola no wainhira ami hare komunidade sira, ami fo hatene ba sira katak ne’e la’os soe foer fatin no mos la’os tur iha neba hodi konversa,” hateten Adjuntu da Silva semana kotuk (12/04) iha Kaikoli, Dili.
Adjuntu ne’e hatutan, problema ne’e nia parte hato’o ona ba iha Komandante, atu oinsa mak bele aumenta membru polisia tranzitu nian.
Tanba ne’e, nia husu ba komunidade hotu, atu lebele soe foer iha postu tranzitu nian tanba fatin ne’e polisia tranzitu sira uza hodi halo kontrola ba movimentu transporte nian.
“Hau hakarak hateten ba komunidade sira hotu, katak postu tranzito ne’e fatin ba polisia, maibe barak maka dehan sei fatin ne’e ba polisia tanba sa maka polisia sira la uza, hau hakarak hatete deit tanba limitasaun membru polisia maibe ami esforsu hela atu aumenta tan numeru polisia,” Adjuntu da Silva informa.
Entertantu Membru Parlamentar, Deputadu Augusto Tara dehan, polisia tenke iha planu ne’ebe diak, nune’e postu hirak ne’e labele sai fatin lixu ba komunidade sira.
”Polisia tenke prezensa iha ne’eba, nune’e komunidade sira labele soe foer,e komunidade sira mo tenke kumpriende katak postu la’os fatin lixu,” sujere Deputadu Tara.
