Diretor Ezekutivu Programa de Monitorizasaun Sistema Judicial (JSMP), Luis de Oliveira Sampaio hateten, bazeia ba monitorizasaun ne’ebe JSMP halo durante ne’e katak, kazu violensia kontra feto no labarik registu maka’as iha Tribunal Distrital Dili, Suai, Oe-Cusse no Tribunal Distrital Baucau.
Tuir Diretor Sampaio, volume kazu violensia kontra feto no labarik aumenta, tanba komunidade barak ,liu-liu feto sira hatene ona katak violensia dometika ne’e krime publiku no iha ona lei atu resolve tuir dalan legal.
“Maioria kazu ne’ebe ami infrenta tuir prosesu julgamentu no ami halo monitorizasaun, hatudu katak feto no labarik mak sai vitima maka’as liu ba violensia domestika no violasaun sexual,” dehan Diretor Sampaio, semana kotuk (10/04), iha nia knar fatin Colmera, Dili.
Diretor Sampaio dehan, husi kazu registu 15, iha ne’en mak kazu violensia hasoru feto (violensia Domestika, no violensia seksual) hatudu katak violensia hasoru feto ne’e kada loron aumenta ba bei-beik.
Nia hatutan, iha kazu balun hetan duni pena suspensaun, maibe iha balun mos suspeitu no arguido deside rezolve liu husi justisa tradisional (diak malu), ho razaun prosesu julgamentu kleur.
Diretor ne’e afirma, iha lei kodigu penal fo fatin ba juis sira atu halo konsiliasaun, bainhira suspeitu no vitima hatudu baze legal ho tipu akordu iha Tribunal nia oin, suspeitu mos promete katak sei la halo tan violensia iha futuru.
Iha parte seluk Prezidente Grupu Feto Parlamentar Timor-Leste (GMPTL), Josefa Alvares Soares, rekonese katak violensia kontra feto no labarik sei akontese maka’as tebes iha rai laran, ezemplu hanesan obriga labarik involve an iha servisu ne’ebe kategoria todan hodi hetan osan atu sustenta familia uma laran no hetan mal trata, baku tanba komunikasaun iha uma laran menus.
“Hau hanoin ita atu muda mentalidade ema ida nian ne’e susar oituan, tanba ne’e buat ida dialogu iha uma laran ne’e importante tebes katak hasoru problema ho ulun malirin, e nei-neik bele muda mentalidade ne’ebe ladiak iha uma laran,” dehan Prezidente Soares.
Tuir nia, violensia kontra feto no labarik dala barak akontese tanba impaktu husi suspeitu konsume alcohol (tua manas) liu estandar inklui mos fator ekonomia uma laran, no edukasaun ne’ebe minimu.
