Planu atu hari edifisiu foun ba Parlamentu Nasional (PN) iha Tasitolu ne’ebe oras ne’e iha ona dezenu, maibe labele realiza tanba orsamentu la to’o.
“Hau hanesan Sekretaris da Meja hau hatene katak, iha ona nia dezenu so ke nia modalidade bo’ot tebe-tebes,” hateten Sekretaris Meja PN, Deputada Maria Exposto, semana kotuk (12/04) iha Uma Fukun, Dili.
Tuir Sekretaris Deputada Exposto, lolos edifisiu ne’e tama ona iha faze konstrusaun maibe kansela tanba orsamentu limitadu.
“Tanba dezenu nebe mak ema nain tolu hatama ne’e bo’ot hotu deit, ita uza ida nebe los,” dehan Sekretaris Deputada Exposto.
Entertantu Deputada Ilda Maria da Conceicao hateten, orsamentu tinan ba tinan aprova hela deit ba edifisiu ne’e maibe to’o agora sidauk hare ba konstrusaun edifisiu foun ne’e.
“Tinan-tinan ami hare deit mak dezenu, e dezenu ne’e iha tinan rua kotuk ninian, estudu halo hela deit, osan mak tau bo-bo’ot maibe ami seidauk hetan informasaun husi Parlamentu kona ba estudu ne’e,” kritika Deputada ne’e.
Deputada ne’e husu ba funsiunariu PN ne’ebe mak toma konta kona bba planu ne’e, atu fo informasaun ba deputadu sira kona ba estudu viabilidade, “prosesu la’o to’o iha ne’ebe, gasta osan hira e hira mak sei iha, tenke hatene, purke ami ami seidauk hatene ba prosesu ida ne’e,” Deputada ne’e husu.
Entretantu tuir Deputadu Mario Viegas Carascalao, seidauk nesesidade atu hari edifisiu foun PN nian, tanba povu barak mak sei kiak hela no presiza hetan atensaun husi estadu ida ne’e.
“Tuir hau nia hare preoridade seluk barak tebe-tebes,aspeitu sosial ita nia povu barak mak sei iha mal nutrisaun, e edifisiu Parlamentu agora sei sufsiente hela,” Deputadu Carascalao dehan.*
