Tuir Xefe Divisaõ da Apoio ao Plenaria Armando Machado katak, iha segundu Legislatura durante tinan lima ne’e Parlamentu Nasional (PN) konsege aprova leis hamutuk 189, e leis hirak ne’e balu mai husi Governu no balu husi Deputada no Deputadu rasik iha PN.
“Proposta de lei nebe maka governu aprazenta mai iha Parlamentu ne’e hamutuk 57 proposta de lei, mai iha parlamentu diskuti no aprova tuir regras rejimental nebe maka aplika iha PN, depois iha mos inisiativa Deputadu sira nian nebe aprezenta iha PN, no PN deskuti no vota ne’e hamutuk 28, maibe sira konsege aprova deit 20, sei hela balu projetu de lei nebe maka sei pendent hela,” hateten Xefe Machado, semana kotuk (11/04) iha PN.
Tuir nia, iha mos lei sira nebe maka PN haruka ba Prezidente Republika (PR) atu halo promulgasaun ne’e, iha PR veta hamutuk 4, husi Parlamentu mos diskuti no mos aprova rezolusoens, rezolusoens nebe maka PN rasik aprezenta e rezolusoens nebe governu maka aprezenta mai iha PN.
Xefe Machado hatutan, projetu rezolusoens nebe maka PN rasik aprezenta hamutuk 87, no proposta rezolusoens husi governu hamutuk 39, purtantu total lei nebe maka PN produs hamutuk 189.
Iha lidun seluk Deputadu Augusto Tara hateten, produs leis 189 durante segundu legislature ne’e, la’os servisu ne’ebe fasil.
”Lei balu tama ne’e halo ami han malu, balu pro no balu kontra, nebe lei 189 ne’e hanesan produsaun husi segunda lesgislatura ninian, esforsu bo’ot ida maka membru parlamentu hamutuk ho Prezidente PN, tanba ita hare ne’e la’os servisu nebe maka fasil,” dehan Deputadu Tara.
Tanba ne’e, nia parte apela ba Institusaun hotu no komunidade sira atu implementa lei tuir nia dalan no labele viola lei nebe maka halo tia ona.
“Hau hare lei ne’e barak no PN lakon tempu barak hodi halo lei maibe implementsaun lei ne’e maka minimu liu tuir hau nia observasaun tanba ne’e maka ba orgaun hotu-hotu institusaun hotu-hotu nebe maka reprezenta estadu para implementa lei ne’e tenki maximu no ita tomak hakru’uk ba lei nebe maka trasa ona,” Deputadu Tarra apela.
