Xefe Suku Lifau, Distritu Oe-Cusse, João da Costa, preokupa ho kondisaun Estrada ne’ebe husi loron ba loron aumenta aat tanba alkatraun sira nakloke hotu no impaktu ba movimentu transporte.
Tuir Xefe Suku da Costa, governu rehabilita tiha ona Estrada sira ne’e, maibe ateru deit ho rai e bainhira tempu udan, bee lori hotu rai no tempu bailoro, halo rai rahun suar maka’as.
“Iha tinan sira liu ba, governo iha duni hanoin halo rehabilitasaun mai taka deit ho rai mutin, nia konsekuensia maka tempu udan tahu barak no bailoron rai rahun mutin sa’e tama to’o komunidade sira nia uma, dala ruma hamosu mos moras mear, isin katar, kabun moras,” Xefe Suku ne’e kestiona.
Xefe Suku ne’e mos husu ba Governu atu halo ponte Tono no Noe Fefan ne’ebe liga ba Sub- distritu Nitibe.
“Pior liu governu promesa no plano ona atu halo ponte Tono ne’e, to’o agora la realiza, entaun tempu udan ne’e komunidade partense Lifau to’o Nitibe la bele halo movimentu ho diak tanba ponte la iha,” Xefe Suku ne’e komenta.
Iha sorin seluk Reprezentante Joventude husi Sub-distritu Nitibe Agustinho Afulit hateten, desde ukun aan to’o agora, Governu seidauk halo rehabilitasaun ba sira nia Estrada.
“Besik tinan sanulu resin ida ho balun ona, dezenvolvementu iha partense Nitibe espesialmente Citrana nunka halo ka hetan atensaun masimu hosi governo sentral, sorti Indonezia sai halo kedas, se la’e sa kuitadu ami la bele asesu operasaun ba transporte ba mai,” Joventudi Afulit dehan.
Nia parte esperansa katak ba future, govenru bele hadia ka rehabilita sira nia estrada, nune’e komunidade iha Sub-distritu ne’e bele lori sira nia produtu local ba merkadu.
Hatan ba kestaun ne’e Diretor Interino Obras Publiku Distritu Oé-Cusse, Candido dos Reis Amaral katak, tuir lolos ponte Tono halo tiha ona iha 2010, maibe la konsege tanba iha kompania balun halo reklama ba tribunal hodi kansela tiha.
“Ponte Tono provizoriamente la bele halo lai, tanba iha kompania balun maka hatama reklamasaun ba iha Tribunal hodi nune maka la bele realiza,” dehan Diretor Interino Amaral.
Nia hatutan, oras ne’e dadaun,sira halo hela levantamentu de dadus no hein nia prosesu kontinuasaun.
Entretantu Administrdor Distritu Oé-Cusse, Jose Tanesib Anunu hateten, Distritu Oé-Cusse hetan alokasaun ekipamentu pezadu atu halo rehabilitasaun.
“Dalan iha kapital no rural dadaun ne’e, halo namanas hela hosi kompania inklui ekipamentu pezadu sira loke dalan ba sentru votasaun, falta fatin rua ka tolu mak seidauk eiha tempo badak bele solusiona,” Administrador Anunu hateten.*
