Problema rede komunikasaun Timor Telkom (TT) impede servisu Polisia sira iha Distritu Baucau, lliu bainhira atu halo atuasaun ba problema ruma ne’ebe mosu iha komunidade nia le’et.
“Hau hanoin sai hanesan obstaklu ba Polisi Nasional Timor-Leste laiha, so iha kestaun tecniko rede Timor Telkom nian ne’e mak sai obstaklu,” hateten Komandante Polisia Distritu Baucau, Faustino da Costa, semana kotuk (27/02) iha Distritu Baucau.
Komandante da Costa lamenta ho problema ne’e, tanba problema ne’e la’os agora mak akontese maibe uluk kedas kuaze fulan hat lima ona.
“Ami sempre eziji buat ida ne’e ba Komando ate Prezidente mai halo vizita iha ne’e mos hau hato’o ida ne’e, preokupasaun ba komunikasaun nian tanba liga telemovel araska liu,” dehan tan Komandante da Costa.
Tuir nia, ho problema ne’e, dalabarak polisia sira tarde halo atuasaun ba konflitu ruma ne’ebe mosu, e komunidade konsidera polisia mak la professional hala’o servisu.
Iha parte seluk Komunidade Augostu Martins hateten, PNTL nudar Instituisaun Governo nian, tenki servisu ho profesional atu komunidade sira bele fiar.
“Hau la konkorda mak bainhira iha problema ruma mak ita kontaktu ba sira telephone fora da area hela deit, ida ne’e mak hau la konkorda,” komunidade Martins preokupa.
Maske nune’e, nia rekonese katak polisia sira halo ona servisu ho diak, tanba ho sira nia prezensa iha komunidade nia le’et, situasaun komesa hakmatek, liu-liu iha Distritu Baucau nian laiha ona problema.
