Tanba falta de salas aulas, obriga estudante husi eskola Nobel da Paz tenke tur deit iha rai hodi tuir izame trimester nian.
“Hau nia meja kadeira kuaze 700 resin, hau hetan husi Korea 250, husi Rotari Club Australia ninian 400, inklui misaun balun fo ajuda mos, maibe salas mak la sufsiente atu tau meja no kadeira sira ne’e, entaun estudante sira tur ka hamrik deit mak tuir izame,” hateten Diretor Eskola Nobel da Paz, Pedro Nunes Menezes, semana kotuk, (29/03) iha Kintal Bo’ot, Dili.
Diretor Menezes informa, difisil ba nia atu buka fatin seluk, hodi meja no kadeira sira ne’e bele tau no alunus sira bele tur.
“Prezidenti da Republika mos mai iha ne’e bolu tan hau, ba duni iha ninia Gabinete koalia ona katak Prezidenti sei esforsu,” Diretor Menezes dehan.
Tuir nia, maske eskola ne’e eskola privadu, maibe Governu sempre fo apoiu hanesan livrus no materia ezame nasional.
Eskola Nobel da Paz iha deit sala hat, sala rua ba sekundariu no sala rua seluk ba pre-sekundaria, enkuantu total estudante hamutuk 583 alunus.
“Eskola ne’e iha turma sanulu, turma lima tama dader no turma lima seluk tama lokraik,” Diretor ne’e informa.
“Agora ami izame ne’e tau ba etapa tolu, primeiru etapa ba Primeiru ano no Segundu ano ba Secundariu. Ezame to’o tuku 10:00 dader, depois tuku 10:00 ba to’o tuku 12:00 ba Terseiru ano Secundariu, depois tuku 12:00 to’o tuku 17:00 ba Pre-secundariu,” esplika Diretor Menezes.
Profesores sira ne’ebe hanorin iha eskola ne’e, mesak voluntariu deit.
Entertantu Estudante Ricardo de Jesus, hateten durante ne’e sira tur deit iha kadeira, wainhira hakerek kaderno tenki tau iha sira nia kelen mak foin hakerek.
“Ami nia aprendizajen durante ne’e la’o diak hanesan eskola sira seluk maibe eskola mak la iha kondisaun, sala la to’o,” Estudante de Jesus preokupa.
Iha fatiin hanesan Profesor Jeremias Pinto de Jesus afirma, durante ne’e nia hanorin iha eskola ne’e ho voluntariu deit.
“Ita nasaun ida independensia ita rasik tenki forma buat ruma,labele tabele ba ema seluk,”de Jesus tenik.
Profesor ne’e dehan, maske susar maibe sira esforsu an nafatin lori eskola no estudante sira ba oin.
“Hau Volontariu deit maibe hetan transporte oituan nebe mak mai husi ita nia alin sira nebe selu ful-fulan dolar hat,” Profesor de Jesus dehan.
