Ho involvement feto iha Instituisaun Polisia Nasional Timor-Leste (PNTL) ne’ebe agora atinji ona numeru 576 (polisia feto), tuir Membru Grupu Feto Parlamentar Timor-Leste (GMPTL) Deputada Carmelita Moniz katak, ne’e progresu ne’ebe diak tanba Instituisaun PNTL mos komesa promove ona igualidade jeneru.
“Ne’e hanesan progresu diak ida e hau kontenti ita nia feto maluk sira hakarak deside sai nudar membru PNTL, agora buat ida importante ba ita katak espasu diak ida ita hatudu ona 576 husi membru PNTL sira seluk,” hateten Deputada Moniz, semana kotuk (02/04) iha Uma Fukun, Dili.
Deputada Moniz husu, atu feto polisia sira tenke hasa’e tan kapasidade, nune’e bele sai komandante hodi hatudu katak feto mos bele no bele sai lider ne’ebe iha kualidade.
“Maluk feto PNTL sira neba ne’e tenke iha liu tan kualidade pareser komandante, no husu mos ba komandante PNTL para hare katak iha feto sira nebe maka iha kapasidade, iha kualidade diak tenke promove sira para sai netik komandante,” Deputada ne’e sujere.
Entretantu Komandante Jender Fokal Point Nasional Distritu, Umbelina Soares total membru PNTL feto husi Distritu no Nasional ne’ebe agora dadaun ativu hamutuk 576 pesoas.
“Total feto iha PNTL ne’e hamutuk 576 ne’e iha distritu sira no mos iha nasional, kona ba ami nia servisu normalmente ami hala’o ho balansu katak la hare ba feto no la hare ba mane, hotu-hotu hanesan deit,” dehan Komandante Soares.
Tuir nia, nudar feto sempre hasouru difikuldade bainhira hala’o servisu, maibe problema ki’ik oan no bele resolve.
