Alunus 599 husi Eskola Pre-primaria Oe-lulan no Noapai, Distritu Oe-Cusse tenke tuir prosesu aprendizajen iha kapela no merkadu laran tanba sira nia eskola hetan estragus total hosi udan no anin bo’ot ne’ebe akontese iha 17 Marsu, fulan kotuk.
‘’ Prosesu hanorin iha ami nia eskola Oe-lulan ne’e iha deit kapela laran tanba iha koperasaun diak husi inan-aman alunus inklui sarani sira hodi haruka ami atu hala’o aktividade ho sementara deit tanba ezame besik dadaun,’’ dehan Profesor Pedro Anunu, semana kotuk, iha Distritu Oe-Cusse.
Alunus 599 ne’e kompostu husi nain; nain 218 husi Eskola Pre-primaria Oe-Lulan husi Suku Naimeko hala’o prosesu aprendizajen iha kapela no Eskola Noa-Pai hamutuk 381 iha merkadu Suku Cunha.
Maske nune’e, tuir Profesor Anunu, sira kontinua hasoru problema tanba alunus barak liu, tanba ne’e husu ba Edukasaun Rejional atu apoiu lona, hodi loke tan sala foun.
‘’Hau husu ba edukasaun atu bele toma medida ho urjentemente hodi responde, sela’e bele impede ami nia aktividade, tanba alunus barak sulan de’it iha kapela laran, ne’e la to’,” Profesor Anunu husu.
Entretantu Professor Eskola Pre-primaria, Domingos da Cunha hateten, nia alunus sira halo prosesu aprendizajen iha Merkadu Bansone.
Enkuantu Diretor Educasaun Rejional Distritu Oé-Cusse, Justinho Neno rekonese katak dadaun ne’e alunus husi eskola sub- baziku Oe-Lulan no Noapai tenke tuir prosesu aprendizajen iha merkadu no kapela tanba situasaun mak obriga maibe tempo besik sei hari eskola emergensia rua (2) ba eskola refere.
“Hau hanoin ida ne’e la problema ida, ho mieus ne’ebé hau ho mestre no inan aman alunus sira foti la sala ida, ho intesaun katak atu prosesu eskola ne’e la bele paradu, li-liu atu hatan prosesu izame iha fulan ida ne’e nia laran. Iha tempo besik ami hosi educasaun sei konstrui ka hari uma escola emerjensia foun maibe nia modelu ne’e hanesan permanente,” hateten Diretor Neno.
Diretor Neno hatutan, husi dezastre naturais ne’ebe akontese, kuaze estraga eskola lubun ida iha Distritu Oé-Cusse, tanba eskola sira ne’e nia konstrusaun kleur ona husi tempu Portugues no Indonezia nian.
