Tuir Xefe Estadu Jose Ramos Horta, rekrutamentu polisia foun ne’ebe Instituisaun Polisia Nasional Timor-Leste (PNTL) halo, hafoin krizi 2006, ne’e progresu ne’ebe mak diak.
“Nudar Xefe Estadu, hau hato’o hau nia parabens no obrigadu ba Komandante Jeral ho nia kolega sira iha Komando PNTL e mos ba UNPOL, durante tinan lima nia laran harii fila fali instituisaun PNTL, hafoin krizi 2006 ne’ebe ita nia instituisaun PNTL nakfera no lakon povu nia konfiansa,” Xefe Estadu Horta fo parabens iha serimonia aniversariu loron PNTL ba da-12, (27/03) iha Kaikoli, Dili.
Xefe Estadu Horta haktuir, durante ne’e polisia sira hala’o sira nia knar ho diak no tulun husi espiritu nebe maka mai halo povu konfia papel polisia iha rai laran.
“Tanba espiritu nebe foun no mai moris iha imi nia laran mak iha tinan hat no lima nia laran ne’e ita hare povu fiar fila fali PNTL, povu husu rasik PNTL atu marka prezensa barak liu iha teritoriu tomak,” dehan Prezidente Horta.
“Problema balun komportamentu disiplina, maibe ita hare iha setor ida ne’e mos dadus nebe mai hau nia liman hatudu ke iha maioria loron-loron nebe ita bele mehi sei to’o tinan ruma ita nia polisia sei sai hanesan professional ou komportamentu diak hanesan polisia nebe diak liu iha mundu ne’e,” esperansa Prezidente Horta.
Iha biban hanesan Komandante Jeral PNTL, Komisariu Longuinhos Monteiro fo kongratula ba komandante sira iha Distritu 13 ho nia membrus tomak ne’ebe kolokadu hodi selebra aniversariu ba da 12 ne’e iha distritu ida-idak.
”Ba imi hotu nia esforsu, dedikasaun no profesionalismu nebe imi hatudu durante eleisaun prezidensial, hein katak profesionalismu ne’e sei hatudu dala ida tan iha segunda ronde eleisaun prezidensial no parlamentar, nebe maka sei hala’o iha fulan hirak mai, ” dehan Komisariu Monteiro.
Komisariu Monteiro mos husu ba membru PNTL tomak atu halo reflesaun hikas ba servisu ne’ebe sira halo ona durante ne’e.
“Ofisiais Sarjentu no Ajente especial tomak maske ohin ita sente haksolok hodi rona kongratula oin-oin ba esforsu no ba ita nia profesionalismu hodi kumpri ita nia dever no obrigasaun durante elisaun jeral prezidensial ninian, nudar imi nia komandante jeral hau husu nafatin para ita idak-idak hodi halo nafatin reflesaun no izame konsensia ba saida mak ita halo ona durante ne’e, saida maka ita seidauk halo no saida maka ita tenkiser halo oin mai,” dehan Komisariu Monteiro.
