Komandante Jeral Polisia Nasional Timor-Leste (KomJer-PNTL), Komisariu Longuinhos Monteiro husu ba membru polisia sira, atu labele lori instituisaun estadu, liu-liu seguransa hodi inklui iha kompetisaun politika iha rai laran.“Ami halo afirmasaun liu-liu iha PNTL nia naran, katak laiha nein membrus PNTL ida maka involve direitamente ba kualquer aktus ou pratika politika iha terenu, karik iha instituisaun iha nia meus para atu bele rezolve ou prosesa kedas ho prosedimentu instituisaun ninian,” hateten KomJer PNTL, KOmisariu Monteiro, iha serimonia aniversariu loron PNTL ba da-12 (27/03) iha Kaikoli, Dili.
Komisariu Monteiro hato’o kestaun ne’e relasiona ho voatus ne’ebe lori instituisaun estadu rua (PNTL-F-FDTL) nia naran hodi tau iha batalha politika ne’ebe komesa espaila iha komunidade nia le’et.
“Tanba ne’e hau nudar Xefe ba Instituisaun Seguransa, apela ba komunidade hotu atu konfiansa ba ita nia polisia, atu mantein seguransa iha eleisaun prezidensial segunda volta no parlamentar bele la’o ho diak,” apela Komisariu Monteiro.
Iha biban hanesan Komandante Jeral Forsa Defeza Timor-Leste (KomJer- F-FDTL), Xefe Estadu Maior Lere Anan Timor, FDTL nia misaun mak atu garante independensia nasional, integridade territorial, hasoru ameasa external husi liur,
liberdade no garante seguransa ba povu.
“F-FDTL tenke apartidade, labele tuir ema ida ne’e ga ida ne’eba, grupu ida ne’e ga ida ne’eba, partidu ida ne’e ga ida ne’eba, tenke hakru’uk ba lei no konstituisaun,” hateten XefeEstadu Maior Lere Anan Timor.
Tuir Xefe Estadu, ida ne’e garante iha Konstituisaun Republika Demokratika Timor-Leste (RDTL), artigu 146, pontu 2 no 3.
