Diretora Nasional Relasaun do Trabalho Sekretariu Estadu Formasaun Professional e Empregu (SEFOPE), Auxiliadora de Gusmão Guterres hateten, pagamentu Tunjangan Hari Tua (THT) ba eis Funsionario Indonezia (Exs PNS) ba segunda faze nian sei realize iha tempu badak.
“Agora dadauk ami seidauk bele publika naran ba sira ne’ebe naran seidauk sai iha primeira faze ba Asabri no terseira faze Taspen (Tabungan Asuransi Pensiun) maibe iha tempu badak sei publika no sira bele hare iha Sede Administrasaun Distritu ida- ida nian,” hateten Diretora Gusmão, semana kotuk (03/04) iha nia knar fatin Kaikoli, Dili.
Tuir Diretora Gusmao, eis funsiunariu (tantu Asabri no TASPEN) ne’ebe simu ona iha primeira no II faze sei la simu tan, maibe ba sira ne’ebe naran taka iha lista iha primeira no II faze, sir abele simu iha faze agora ne’e, tanba ne’e sira nia direitu.
Total orsamentu ne’ebe sei selu ba iha segundu no terseira faze ne’e hamutuk um miliaun resin dolares Amerikanu, enkuantu total eis funsiunariu Asabri nian hamutuk 824 no TASPEN iha 4.001 pesoas.
Tuir dadus ne’ebe SEFOPE iha katak eis funsionariu Asabri ne’ebe naran publika atu hetan pagamentu iha primeira faze iha 2010, hamutuk nain 1.109 , nain 1.001 mak simu ona pagamentu, no nain 108 mak lakonsege simu, nune’e mos pagamentu ba segunda faze ba TASPEN naran ne’ebe publika hamutuk nain 7.511, nain 6862 mak simu ona pagamentu, nain 649 mak seidauk simu.
Iha parte seluk Membru Parlamentu Nasional, Deputada Josefa Alvares Soares hateten, nudar reprejentante povu iha Parlamentu sente duvida ho prosesu pagamentu ne’ebe iha no nia laiha serteza sen pursentu, governu Indonezia atu bele fo pagamentu ne’e ba eis funsionario sira.
“Karik iha rezultadu positivu husi negosiasaun ne’ebe iha, ita hein to’ok iha tempu badak ne’e sira sei fo pagamentu ne’e ka lae? Tanba bainhira ami ba Indonezia ami mos iha enkontru ida ho KomNas Hak Asasi Manusia, mais sira susar oituan atu koalia kona ba direitu sira ne’ebe pendente,” duvida Deputada Soares.
Nia hatutan, ema nia direitu tenke fo labele rai no impede tanba uza ema hodi halo servisu iha obrigatorio atu selu ema nia servisu ne’ebe kontribui.
