Diretor Nasional Emprego, Paulo Alves husu ba doutores sira iha Ospital Nasional Guido Valadares (HNGV) ne’ebe halo teste mediku ba kandidatu trabalhador sira, atu labele halo pasa sira ne’ebe detekta iha moras.Diretor Alves hato’o kestaun ne’e relasiona ho trabalhador nain rua iha Korea du Sul ne’ebe tenke fila mai rai laran maske foin mak ba, tanba afetadu moras sifilis.
“Ami sei kordena ho doutor sira tanba doutor sira mak hatene liu, ami husu ba sira favor ida karik oan, ka subrina ka subrinu rasik mak ba mos tenke honestu, katak moras labele husik liu, tanba se la’e to’o iha Korea mak mai fali, ita mak rugi,” sujere Diretor Alves, semana kotuk (26/03) iha Kaikoli, Dili.
Atu labele akontese tan iha future, Diretor Alves hatutan, Sekretariu Estadu Formasaun Profesional e Empregu (SEFOPE) sei fo atensaun diak liu tan ba ezame mediku ne’ebe halo ba kandidatu trabalhador sira, tanba trabalhador barak mak fila ona, kauza husi moras sifilis ne’e.
Maibe tuir Diretor Alves, kazu hanesan ne’e la’os foin akontese, akontese dala hat ona, trabalhador sira sai husi Timor ho kondisaun saúde diak, ba to’o iha Korea hetan moras.
“Visa tama semana rua sira hala’o ezame mediku laiha moras maibe moras hada’et la’o nafatin, se la kuidadu an moras bele kona,” Diretor ne’e dehan.
Entretantu Sekretariu Estadu Formasaun Profesional e Empregu, Bendito Freitas husu ba kandidatu trabalhador sira tenke onestu, kuandu iha moras tenke koalia sai, nune’e labele hasai osan dala rua.
“Ba alin trabalhadores sira tenke hatudu buat ida dehan katak kejujuran, ba imi nia an katak saúde ne’e kontrola lolos tiha, kondisaun saúde diak ka lae? se detekta hetan moras haruka fila ho osan rasik ne’e difisil tebes,” dehan SE. Freitas.
Tuir SE. Freitas, ezame mediku la’os dala ida deit iha Timor, maibe iha Korea mos halo tanba ne’e prepara aan didiak, nune’e problema hanesan labele akontese iha future.*
