Joventude hosi Distritu Oé-cusse nain 12 sei hala’o mini intercambiu hamutuk ho Joventude Distritu Ermera nian iha 26 Marsu, ho objetivu atu hametin unidade no paz entre joventude husi Distritu rua ne’e.Programe Officer Joventude Distritu Oé-cusse Domingos Punef, hateten minis intercambiu ne’e sei durante semana ida, ho partisipante joventude husi distritu rua, kompostu husi feto nain neen no mane nain neen.
“Mini intercambiu ne’e hala’o ba dala rua nian, foin dau-dauk joventude sira husi Ermera hala’o tiha ona mai iha ne’e, no agora ami mak ba fali Distritu Ermera,” hateten Program Officer Punef, semana kotuk, (24/03) iha Centru Joventude Rejiaun Oecusse (CJRO) iha Oe-Cusse.
Programa ne’e rasik hetan suporta husi Caritas Australia, ho objetivu atu halibur joventude sira hodi promove unidade no paz entre joventude sira.
Iha mos atividade hirak ne’ebe sei hala’o iha mini intercambiu ne’e mak, mini seminar, jogu amizade inklui ba vizita fatin importante sira iha Distritu Ermera.
Iha fatin hanesan Partisipante Jacinto Punef, senti kontenti tanba liu husi programa ida ne’e bele hametin liutan unidade juventude sira, liu-liu iha Distritu rua ne’e.
“Ami fo agradese ba programa ida ne’e tanba bele halibur juventude sira iha distritu bele vizita malu liu husi programa intercambiu ida ne’e ,liu husi intercambiu ida ne’e bele hare iha parte dezenvolvimentu, entre distritu rua ne’e oinsa atu fo ita nia kontribuisaun husi Juventude iha future,” dehan Joventude Punef.
“Alende ne’e mos bele kapasita liu tan ita, oinsa atu hadomi ita nia ambiente hanesan distritu sira seluk, oinsa atu kuidadu ita nia ambiente,” Nia katak.
