Ospital Referal Baucau (ORB) hahu fulan Janeiru to’o Marsu, rejistu pasiente hom moras dengue hamutuk nain 24 inklui labarik.
“Ami durante fulan tolu nian laran ne’e rezistu moras dengue hamutuk 18, maibe ami halo teste balun ne’ebe hetan positive no labarik fulan 6 ida mak mate tamba hemorage maka’as,” hateten Xefe Responsabel Emergensia, Claudio Ximenes, semana kotuk (19/03) iha nia knar fatin ORB, Baucau.
Tuir Xefe Ximenes, durante Marsu, pasiente ne’ebe rejistu ho moras dengue labarik minoridade tinan 10 mai kraik nain hat, husi Distritu Baucau nain rua no Distritu Viqueque nain tolu.
“Husi Distritu Viqueque nian, bin-alin nain tolu ho idade, nain ida 15 anos, nia alin ke dua idade 10 anos no alin ikun ho idade tinan hitu, sira nain tolu ne’e husi uma laran ida deit,” hateten Xefe Ximenes.
Pasiente hirak ne’e halo hotu teste iha laboratoriu ORB nian, maibe rezultadu teste ne’e seidauk fo sai e agora sei iha laboratoriu.
“Ami iha fulan Janeiru ne’e, iha pasiente rua deit ne’e suspeitu, maibe konfirmasaun husi laboratorium mos positive labarik hotu deit , iha Fevereiru konfirmative husi laboratorium 16, iha Marsu nain nen(6) positive nain rua,” Xefe Departamentu Emergensia, Ximenes informa.
Iha mos sintoma bainhira kona moras dengue mak hanesan isin manas maka’as to’o 40 derajat, halo ulun moras, muta, vontade atu han laiha, halo labarik isin baruk, la gosta atu han-hemu, halo labarik sira mos bulelu hela deit, labarik lakon nia sentidu no te been.
Atu prevene moras ne’e, uma ninin tenke moos tanba moras ne’e hadaet liu husi susuk, labele tara roupa, tenke hiker, bee nebe nakonu iha vazu aifunan nian tenke troka. “Tanba kuandu tata ema ida susuk ne’e bele semo to’o metro 100,” Nia katak.
Iha parte seluk Xefe Departamentu Pedeatria, Doutora Ana Ximenes hateten iha Marsu nia laran iha pasiente nain hat, ida sei suspeitu, nain tolu mak ida mai husi Lospalos mai ho nia kondisaun ne’ebe grave no to’o iha ospital nia mate tanba ran fakar barak.
“Ami esforsu a’an atu ajuda maibe labele tiha ona no labarik ne’e idade fulan 6 no nain rua mak hela iha ne’e semana ida ona hare deit no observa deit ho soru,kuando nia kondisaun diak ami bele haruka sira atu fila deit ba uma,” hateten tan Doutora Ximenes.
