Atu fo asistensia saude ba komunidade sira iha area rural ho diak liu tan, oras ne’e dadaun Ministeriu Saude (MS) hahu aloka ona 90 % Pesoal Saude ba iha Sentru Saude (SS) iha area rurais sira.
“10 pursentu seidauk aloka maske simu ona pose tanba ita iha limitasaun de orsamentu. Sira gradua ona no balun ba hotu ona hala’o servisu iha Sentru Saúde Sub-distritu hotu-hotu, iha ida rua mak sei iha problema inosentidu ne’ebe seidauk resolve, hanesan fasilidade uma residensia tanba mediku sira ne’e la’os rai nain, entau sira hein iha orsamentu foin bele ba hala’o servisu ho razaun mediku sira seidauk hetan salario,” dehan Diretor Ximenes, semana kotuk (13/03) iha Kaikoli, Dili.
Kona ba salariu ba Mediku no Enfermeiru inklui Parteira sira, Diretor Ximenes hatutan, depende ba iha distansia Distritu ne’ebe sira servisu ba.
“Ezemplu sira servisu iha Distritu Baucau, selu US$300,kada fulan, maibe Distritu ne’ebe do’ok hanesan Lospalos, Oe-Cusse no Suai, sira hetan US$ 400,kada fulan,” Diretor ne’e afirma.
Nia hateten, ba Pesoal Saude sira ne’ebe seidauk desloka ba iha Distritu ka Sub-distritu maske simu ona pose nudar Funsiunariu Publiku, sira tenke tama lor-loron hodi tuir treinamentu no atividade saude nian ne’ebeida hodi hein prosesu alokasaun.
Tuir Diretor Ximenes, katak sistema rekrutamentu ba funsiunariu foun la fasil, liu husi prosesu ne’ebe naruk, MS sei hato’o ba iha Komisaun Funsaun Publika (KFP) hafoin ne’e mak bele halo rekrutamentu.
“Mas tinan ida ne’e konsege rekruta mediku jeral, enfermagen no parteira sira barak,” Diretor ne’e katak.
Iha lidun seluk Membru Komisaun F Parlamentar, Domingos Mesquita hateten ,ne’e hanesan kestaun bo’ot ne’ebe MS hasoru, liu-liu subsidio ba mediku foun sira atu hala’o servisu iha distritu ne’ebe la’os sira nia distritu rasik.
“Sira iha obrigasaun atu kumpri kontratu ne’ebe sira asina ona ho governu atu fo asistensia ba povu, tanba durante eskola estadu mak selu sira, bainhira remata sai ona funsionario publiku, sira nia salario mos sei iha mudansa iha obrigasaun atu kumpri,” dehan Deputadu Mesquita.
Deputadu ne’e dehan, governu iha obrigasaun atu kria kondisaun ba mediku sira, nune’e bele fo asistensia saude ba povu sira, liu-liu iha area rurais tanba povu presiza tebes asistensia saúde ne’ebe ho kualidade.
