Kandidatu Prezidente (KaPrez) ho numeru sorteiu 13, Fernando Lasama de Araujo, optimista katak nia pasa iha primeira rounde ba eleisaun prezidensial ohin loron nian.
“Hau hanoin ohin agora ne’e hau hare katak hau avansa iha primeira rounde,” dehan KaPrez Lasama ne’ebe tuir votasaun iha Eskola Baziku no.09 Aimutin iiha tuku 09:35 oras timor-leste (otl).
Kona ba karik nia parte la pasa iha primeira rounde iha eleisaun prezidensial ne’e, atual Prezidente Parlamentu Nasional ne’e katak, “ ne’e hein lai, tanba haul abele deside mesak,” Lasama hatan.
Maibe karik pasa no eleitu sai Xefe Estadu, Prezidente Organizasaun Renetil ne’e hateten sei servisu hamutuk ho instituisaun tomak atu dezenvolve rai ida ne’e.
“Hau haksolok, sei tau matan ba povu no hau sei kopera hamutuk ho instituisaun hotu hodi dezenvolve nasaun ida ne’e ba oin,” Lasama katak.
“karik la pasa hau hanesan sidadaun bain-bain ida kontinua servi nasaun ida ne’e, laiha buat ida,” hateten atual Prezidente Partidu Demokrata (PD) ne’e.
Lasama mos dehan karik eleitu, programa prioridade ne’ebe nia sei hala’o mak respeita lei no konstituisaun.
“Tanba Prezidente la’os ezekutivu ida ne’ebe dehan katak hadia fali estrada ka ponte, ne’e la’e, book ema hotu, instituisaun hotu-hotu atu kumpri lei ne’ebe iha,” Lasama tenik.
Entretantu Joventude Carlos Soares ne’ebe foin primeira vez tuir votasaun (foin halo 19 anos) sente kontente tanba sira mos bele fo sira nia votus ba lider ne’ebe sira konsidera bele lori nasaun ne’e ba oin.
“Hau kontente tanba foin primeira vez hau tuir eleisaun, hodi vota ba lider sira ne’ebe hau konfia katak sir abele duni ukun nasaun Timor-leste ne’e ho diak,” Joventude Soares dehan.
Enkuantu Joventude Jojo Soares ne’ebe tuir ona votasaun dala rua (tuir votasaun iha 2007 no 2012) bainhira halo komparasaun votasaun iha 2007 no ohin loron, tuir nia tinan ne’e diak liu tanba iha situasaun ne’ebe seguru sein iiha konflitu.
“Tinan 2007, ami sente trauma tanba impaktu husi krizi 2006 nian, entaun ita tuir eleisaun mos la ho seguru, e ohin ne’e ita tuir votasaun ho diak, laiha konflitu,” Joventude Soares kompara.
Joventude ne’e mos husu ba prezidente eleitu atu sai ukun nain ne’ebe diak, tau matan ba povu no kria unidade nasional.
“se deit mak eleitu no sai prezidente tenke tau matan ba povu, liu-liu sira ne’ebe mukit no kiak liu, atu oinsa mak bele hasai sira husi kiak, e mos tau matan ba joventude sira, hodi kria kampu servisu ne’ebe barak nune’e bele minimiza konflitu iha sidade laran,” Joventude ne’e sujere.
Entretantu alende komunidade, membru governu ne’ebe tuir votasaun iha Eskola Baziku no. 09 Aimutin mak hanesan Ministru Negosiu Estranjeiru Zacarias Albano da Costa ho nia espoza Milena Pires, Vise Prezidente PN, Maria Paixao no Vise Ministru Justisa Ivo Valente.
