Relasiona ho motorist (motor ka kareta) barak mak la uza sapa matrikula, Komandante Polisia Tranzitu Nasional Inspektor Xefe Antonio L. C. Soares hateten sidadaun hotu ne’ebe uza motor ka kareta tenke kumpri lei tranzitu nian ne’ebe iha.
“Lei la hare ba se, ida ne’e ga ida ne’eba, lei ba ema hotu-hotu hanesan, portantu ita iha situasaun atual agora dadaun ne’ebe halo hela kampanha, simpatizante balun uza kareta estadu hasai tiha plat ba tuir kampanha, ne’e labele,” hateten Komandante Soares, semana kotuk (06/03) iha Kaikoli, Dili.
Komandante Soares ne’e dehan, tuir kodigu de estrada iha artigu 112 hatur ona katak tantu kareta ou motor estadu ou privadu nian inklui transporte publiku bainhira sirkula iha estrada publiku tenki iha sapa matrikula.
Entretantu tuir Eis Komandante Jeral Polisia Nasional Timor-Leste (KomJer-PNTL) Deputadu Paul de Fatima Martins katak polisia tranzitu tenke halo cek point maka’as ba motorist sira ne’ebe la uza sapa matrikula.
“Se plat laiha tenke tilang no fo multa,” dehan atual membru Komisaun B Parlamentar ne’e.
Nia hatutan, kona ba kareta estadu ne’ebe sirkula la uza sapa matrikula, husu ba Diretores no Ministeriu ida-ida atu kontrola.
“Kuandu kareta estadu, tenke fo hatene ba ministeriu relevante para bele hare kona ba ida ne’e,” nia sujere.
