Julgamentu ne’ebe diriji husi Prezidente Juiza Rosa Brandao hateten desisaun ne’ebe Tribunal foti ne’e la minimu no maximu liu tanba bazea deklarasaun husi testamunha sira.
“Arguidu nia hahalok ne’e rezulta ema nain ida mate maka Valdir César do Nascimento Lebre Correia no nain ida kanek maka Francisco Xavier. Ba vitima ne’ebe mate KUKA, arguidu hetan pena tinan sia no nain ida kanek ne’e hetan tinan rua fulan neen,” dehan Juiza Brandao, semana kotuk (24/02) iha TDD Dili.
Tuir Juiza Brandao katak, atu labele todan ka kma’an liu, TDD deside hamonu sentensa tinan 10 iha kadeia.
Matebian KUKA hetan tiru husi arguidu DG iha 28 Dezembru 2009 (kalan) iha Salaun Delta Nova, bainhira halo hela festa ho nia kolega sira.
Entertantu familia nomos nudar inan husi matebian KUKA, Etelvina Coreia sei duvida ho sentensa ne’ebe TDD fo ba arguidu tanba arguidu husu pedidu ba rekursu.
“Tribunal hatun sentensa ne’e ba arguido DG, katak 10 anos prizaun. Maibe ami seidauk hatene lolos katak arguido ne’e kumpri ba pena nebe maka tribunal foba nia ne’e ga la’e, ou nia sei halo rekursu, tan ne’e ami seidauk hatene tanba advogdu sira seidauk fo hatene ami. Ami hein deit, no tau fiar ba tribunal,” dehan Inan Correia husi matebian Kuka.
Inan Coreia fiar katak buat hotu sei la’o tuir lei ne’ebe mak iha.
“Kona satisfas ou la satisfas, ne’e entrega deit ba iha tribunal wainhira kuandu dehan hatun ba 6 mos diak deit, basta buat sira ne’e la’o tuir nia dalan,” nia dehan.
