Relasiona ho eskola barak mak sei uza ba fatin sentru votasaun nian iha eleisaun prezidensial nian, tuir Xefe Departementu Informasaun Publiku Secretariadu Tecniku da Administrasaun Eleitoral (STAE) Saturnino Exposto Babo katak loron rua antes tama ba eleisaun, sei fo feriadu ba estudante sira.
“Ami kontaktu tiha ona ho parte edukasaun nian no Konselhu Ministru katak eskola fo ona feriadu ba estudante sira antes loron rua tama ba eleisaun, e sira konkorda,” dehan Xefe Babo, semana kotuk (17/02) iha Kaikoli Dili.
Tuir Babo, tanba maioria estudante iha Dili barak mak resenseadu iha Distritu entaun oportunidade ba sira bele fila-fali ba Distritu nune’e bele tuir votasaun.
Nia dehan, sira ne’ebe halo kartaun fiksa iha Dili hodi muda rezidensia nudar fatin geografika entaun sira bele vota iha fatin ne’e .
Entertantu tuir membru Parlamentu Deputadu Francisco Jeronimo, katak komisaun la iha problema tanba ne’e festa demokrasia ba ema hotu .
“Hau hanoin estudante balun mos tinan bo’ot ona, tan ne’e sira mos iha direitu atu ba vota ,” nia katak.
Tuir nia, escola balun ne’ebe sei utilize ba fatin votasaun ne’e hanesan kontribuisaun ida ba estadu. “ita tenki fo dalan, fo kondisaun para bele hala’o eleisaun ne’e ho diak liu,” nia katak.
