Tuir Diretor Jeral Sekretariadu Tekniku Administrasaun Eleitoral (STAE), Tomas do R. Cabral, katak distribuisaun bulletin de votus ba 13 distritus ne’ebe hala’o iha dia 12 de Março bazeia ba numeru eleitores ne’ebe iha kada distritus.
“Distribuisaun bulletin de votus hamutuk 704.000 ne’ebe haruka tuir numeru total eleitores ohin halo distribuisaun iha distritu walu mak ho aviaun tanba kondisaun estrada la favoravel no seluk ho kareta,” dehan DG Cabral, semana kotuk (12/03) iha edifisiu STAE Kaikoli, Dili.
Diretor Cabral hatutan, tuir lolos distribuisaun hala’o iha dia 11 de Março maibe atraza tanba halo verifikasaun ka karimbu kanselamentu ba kandidatu Dr. Francisco Xavier do Amaral, no distribuisaun material ba sentru votasaun sei hala’o iha dia 16.
Konaba tau stiker iha Kartaun Eleitoral, DJ, afirma politika STAE atu tau Stiker ba kartaun eleitoral ne’e ho objetivu atu fasilita eleitores sira la’os impede direitus eleitores.
“Semak latau stiker iha loron votasaun nia ba nafatin maibe nia sei ba buka naran iha sentru votasaun hotu e ema ne’ebe kartaun tau ona stiker nia hatene nia ba vota iha sentru ne’ebe,” Diretor Cabral esplika.
Iha parte seluk Prezidente Comisaun Nasional Eleisoens (CNE), Faustino Cardoso hateten prosesu avaliasaun ba bulletin de votus to’o distribuisaun la’o ho diak tanba hetan apoiu husi joventude, balun suporta husi UNDP tau karimbo kanselado ba kandidatu matebian Dr. Francisco Xavier do Amaral.
“Ohin ita hotu asiste prosesu importante ida atu fahe material sensitivu ba iha 13 distritus atu nune’e dia 17 buat hotu preparadu ona atu eleitores sira iha kondisoens ne’ebe diak atu vota,” dehan Prezidente Cardoso.
Iha lidun seluk Komadante Jeral Polisia Nasional Timor-Leste (PNTL), Komisariu Longuinhos Monteiro hateten PNTL sei halo seguransa ba material sensitivu (bulentin de votus) to’o iha distritu no sentru votasaun tanba sira konsidera material sensitive ne’e hanesan VIP.
“Ami iha obrigasaun no dever atu asegura ba materiais ne’ebe sensituvu husi Dili ba to’o iha STAE distrital no husi distritu ba sentru votasaun husu mos ba se se deit mak hasouru komvoiu material sensitivu kari para labele halo impedementu ruma ,” dehan Komisariu Monteiro.
Eis Prokurador Jeral ne’e mos husu ba sidadaun hotu katak atu buat hotu la’o ho susesu presiza ema hotu nia kontribuisaun liu –liu partisipasaun komunidade tanba instituisaun no organizasaun ida –idak hala’o nia knar.
