Reprezentante Sosiedade Sivil, Organizasaun Non Govermentais (ONG) Rede Feto (RF) liu husi Diretora Yacinta Luzinha husu ba Kandidatu Prezidente (KaPrez) nain 12 ne’e, atu se deit mak manan no sai Xefe Estadu ba period tinan lima oin mai, tenke sai ukun nain ne’ebe diak no hakuak povu hotu iha pais ida ne’e.
“Hau hanesan povu espera katak ema ne’ebe sai lideransa hodi ukun nasaun ida ne’e, povu ida ne’e no sai prezidente ba ita, nia sai prezidente ba ema hotu labele ba partidu ka grupo ida deit, ne’e mak ita lakohi, tanba povu Timor hakarak moris iha paz no estabilidade nia laran,” esperansa Diretora Luzinha, semana kotuk (07/03) iha Salaun Delta Nova, Comoro Dili.
Diretora ne’e mos fiar katak promesas ne’ebe KaPrez sira hato’o a povu durante iha sira nia kampanha bele realiza bainhira sira kaer ukun.
“Atu povu mos bele sente dezenvolvimentu nasaun nian, liu-liu povu iha area rurais labele promete deit iha ibun tutun ikus mai sai eleitu no simu knar nudar prezidente haluha tiha promesas sira ne’e,” hateten Diretora ne’e.
Husu mos ba Prezidente eleitu atu tau matan ba feto, liu-liu fo posibilidade kapasitasaun ba feto, promove igualidade jeneru, nune’e feto mos bele hola parte iha dezenvolvementu nasaun ida ne’e nian.
“Maske ida ne’e la’os kompetensia prezidente nian, maibe hanesan Xefe Estadu bele hare kona ba lei, hodi reforsa artigu sira ne’ebe hakerek ona iha Konstituisaun RDTL kona ba igualidade jeneru,”Diretora ne’e esperansa.
Iha lidun seluk Komunidade Comoro, Rozantina da Costa hateten figura Prezidente ne’ebe sei kaer ukun ba nasaun ida ne’e tenke ema ne’ebe matenek no iha espiritu unidade nasional. “Tenke kalma, hakuak no hadomi ema hotu iha pais ida ne’e,” katak Komunidade da Costa.
“Hau nudar sidadaun nune’e mos estudante hau nia esperansa ba oin mak hau hakarak lideransa ida ne’ebe bele halo koperasaun servisu diak ho governu atu kria politika diak iha area edukasaun no saude tanba atu nasaun dezenvolvidu edukasaun tenke alkansa,” dehan Komunidade da Costa.
