Relasiona o eleisaun jeral presidensial ne’ebe besik dadaun ona, atu ema hotu bele partisipa iha festa demokrasi ida ne’e, Sekretariadu Tekniku Administtrasaun Eleitoral (STAE)fo edukasaun votantes ba membru Ahisaun Disability Foundation kona ba lala’ok eleisaun nian.
Tuir Kordenador STAE Distritu Dili, Agostinho R. Gomes katak iha ne’e sira fahe informasaun kona ba lala’ok eleisaun nian liu-liu kona ba data, oras no sistema eleisaun nian tanba sistema eleisaun tinan ne’e diferente ho tinan hirak liu ba.
“Maluk sira iha ne’e sira susar atu asesu ba iha fatin votasaun publiku entau ami hakbesik an mai iha ne’e atu fahe material ba sira hanesan loron eleisaun, saida mak sira sei lori nune’e iha tempu votasaun sira labele duvida no sira bele tuir vota hanesan mos sidadaun seluk tanba nudar sidadaun ida iha direitu atu vota,” dehan Koordenador STAE Distritu Dili, Agustinho R. Gomes, semana kotuk (10/02) iha Salaun Ahisaun, Aimutin Dili.
Koordenador Gomes mos promete ba joven disabilidade sira iha Asosiasaun ne’e katak iha loron eleisaun, sira tenke mai tuku 07:00 dader nune’e bele vota uluk no la presiza forma linha.
Gomes mos informa ba sira katak total kandidatu ba president da republika hamutuk ema nain 14 maibe kona ba se se mak bele ukun, depende ba povu tanba povu mak sei hili sira. “Povu mak determina destinu nasaun nian tanba ne’e povu nian lian hanesan osan mean ida,” nia katak.
Iha fatin hanesan Responsavel Asosiasaun Ahisaun Disability Foundation, Angelino de Sá Benevides hateten formasaun ida ne’e importante tanba iha ne’e sira barak mak seidauk hatene kona ba lala’ok eleisaun nian.
“Ami apresia tebes ho informasaun ne’ebe koordinador Distritu STAE informa katak sei fo oportunidade especial ida ba maluk sira ne’ebe kartaun eleitoral husi distritu atu bele trata fali tanba sira labele fila ba distritu ho kondisaun ne’ebe lapremite, nudar responsavel ami sei esforsu hato’o karta ida ba iha STAE atu bele fasilita ami nia kolega balun ne’ebe kartaun husi distritu tanba sira mos iha direitu atu vota maibe ho kondisaun ne’ebe lapremite atu fila ba distritu,” dehan Benevides.
