Komandante Unidade Polisia Tranzitu Nasional, PNTL, Superintendente Antonio Soares fo sai avizu ba motorista ne’ebe sira nia motor uza kanu resin katak polisia kaer sei multa US$120.
Superintendente Soares dehan tuir Artigu 64 Lei Tranzitu nian motor ho kanu resin labele halo sirkulasaun tanba halo barulhu iha komunidade nia le’et.
“Selu multa mais u menus US$24 to’o US$120 depois de sira troka tiha kanu resin foin fo fali sira nia osan,” hateten Superintendente Soares, semana kotuk (07/02), iha knar fatin PNTL, iha Kaikoli, Dili.
Nia hatutan katak oras ne’e daudaun polisia konsege prende ona motorizada ho kanu resin hamutuk 101 resin ne’ebe rai hamutuk iha polisia tranzito Distritu Dili nia armajem hosi hein hodi halo tuir prosesu ne’ebe determina ona.
“Ami sei publika ba iha publiku bainhira halo pemusnahan, atu nune’e motorista sira ne’ebe gosta uza kanu resin, sira bele hare no labele halo tan,” nia katak.
Kona ba atu halo bengkel ka loza ne’ebe fa’an kanu resin, Soares dehan nia parte labele halo prevensaun ba sira tanba seidauk iha baze legal ida no ida ne’e kompetensia husi Diresaun Nasional Komersiiu da Industria nian.
“Ami uluk halo ligasaun ho Diresaun Nasional Komersiu Industria kona ba fa’an kapasete nian ne’ebe la tuir standard, oinsa sira bele hare loja ka emprezariu ne’ebe faan kapasete ne’e. Maibe atu prevene ba bengkel ne’ebe fa’an kanu resin ami laiha lei ida,” nia tenik.
Entretantu tuir Deputadu Cornelio da Conceicao Gama katak motorizada ne’ebe uza kanu resin ne’e kontra lei no presiza halo cek point ba sira.
“Polisia tenke rekolla hotu no halo sira selu multa,” hateten Deputado Gama.
