Relasiona ho preokupasaun husi Fundasaun Mahein (FM) kona ba membru Polisia Nasional Timor-Leste (PNTL) sira bele ka la’e tuir votasaun iha eleisaun tinan ne’e, II Komandante Jeral PNTL Superintendente Afonso de Jesus hateten bazea ba Konsituisaun RDTL, ema hotu iha direitu atu tuir eleisaun, inklui mos polisia sira.
“Tuir saida maka ami intende no saida maka ami hatene, no ami mos eziji para PNTL labele tuir iha votasaun maibe saida maka iha Lei Konstitusaun hatete ona katak sidadaun hotu-hotu iha direitu atu bele ba vota. Importante mak nia labele hatudu katak hau hili ida ne’e,” dehan Segundu Komadante de Jesus, semana kotuk (03/02) iha PNTL Kaikoli, Dili.
Iha sorin seluk tuir Prezidente Komisaun B Parlamentar Deputadu Duarte Nunes, katak hanesan sidadaun ida, sira mos iha direitu atu tuir votasaun, ne’e garante iha Konstituisaun Republika Demokratika de Timor-Leste (RDTL).
“Ne’ebe hau hanoin ida ne’e klaru,” nia katak.
Entretantu iha tuir peskiza FM identifika katak iha kontradisaun entre lei sira ne’e tanba iha lei balun fo direitu ba membru PNTL sira bele vota nudar sidadaun maibe iha lei seluk mos la permitti sira atu tuir votasaun.
