Atu garante alunus sira konsumu aihan ne’ebe iha nutrisaun diak, Hiam Health (HH) servisu hamutuk ho Ministeriu Edukasaun (ME) sei implementa programa to’os eskola (school garden) iha ensino baziku.
Tuir Diretora HH, Rozaria Martins da Cruz, katak estudante sira alende tuir prosesu aprendijazen, sira mos bele aprende kuda aihoris ne’ebe iha valor nutrisaun no aihan liu husi to’os eskola ne’e bele uza fali ba programa merenda eskolar.
“Ita hare aihan ne’ebe uza ba merenda eskolar ne’e laiha valor nutrisaun ne’ebe diak ba labarik sira tanba dala barak inan-aman sira keixa sira nia oan fila ba uma muta no moras tanba hahan (koto) ne’ebe iha ne’e nia pengawetan ne’e sudah lama. Entau ita bele halo to’os eskola ida iha eskola nune’e iha tempu loron Sabadu no feriadu ita hanorin labarik sira nune’e sira bele komprende valor nutrisaun hosi aihoris ne’ebe sira kuda. Programa ne’e mak agora dadaun hau hanoin hela atu foti deit eskola ida hodi halo exemplo se governu iha interese bele uza hau nia organizasaun atu implementa hau sempre prontu atu ajuda,” hatete Diretora HH da Cruz, semana kotuk (27/01) iha Comoro Dili.
Nia hatutan katak maske programa ne’e sei iha planu deit maibe nia sei esforsu atu bele buka doadores ruma husi internasional nune’e bele supporta sira no sei kopera ho ME no Diretores sira husi eskola ensino baziku balun iha capital laran atu nune’e bele implementa programa ne’e iha tinan ida ne’e iha Distritu Dili hodi fo exemplo.
HH seidauk identifika eskola ne’ebe atu implementa inisitativa ne’e uluk.
Iha lidun seluk Vise Presidente komisaun F Parlamentar ne’ebe trata asuntu Edukasaun no Saúde, Fransisco Jeronimo konkorda ho planu husi organizasaun HH atu implementa iha eskola ensino baziku no hanoin katak importante tebes ba estudante sira atu hasae sira nia kapasidade iha pratika.
“Hau nudar membru ne’ebe tur iha komisaun hau hanoin planu ne’e importante tebes lolos ne’e des de uluk kedas ita implemeta ona tanba formasaun ba labarik sira ne’e tenke formasaun ne’ebe itegradu katak ital abele fo deit kuinesementu konaba sensia deit maibe ita mos bele fo kuinesementu ne’ebe iha komunidade nune’e mos labarik sira iha teoria bele aprende kedas iha to’os ne’ebe sira iha,” dehan Deputadu Jeronimo.
