Tuir Staf Senior Traffic Light Diresaun Nasional Transporte e Terestres (DNTT) Joao Eugenio da Silva katak lampu sinais tranzitu ne’ebe durante ne’e la funsiona ho diak, sei troka fali monta foun.
“Ami iha ona planu ba tinan ida ne’e nia laran, iha karga tolu, husi karuk, husi los, iha hotu lampu depois iha klaran ida tan, nune’e kareta bo’ot husi oin taka ona ema kotuk bele hare fali ba leten deit,” hateten Staf DNTT da Silva, semana kotuk (03/02) iha Balide, Dili.
Kona ba bainhira mak atu implementa los, Staff DNTT da Silva dehan seidauk hatene lolos data fixu tanba husi prokuramentu mak halo tenderizasaun ba projetu ne’e.
Nia dehan lampu sira ne’e DNTT hadia be-beik maibe la kleur keima fila fali, tan ne’e mak planu DNTT ba tinan ne’e sei halo fali foun.
“Uluk fo-foun buat ne’e mai husi China iha 2007, ami halo fali renovasaun ida, ahi ne’e mai husi China mas ninia kontroler mai husi Indonesia, ne’ebe buat rua ne’e asves la dun kaer malu, asves ahi mak kema, asves ninia kontroler mak kema tanba ninia frekuensia la hanesan,” nia katak.
Entertantu tuir Deputadu husi Bankada FRETILIN Francisco Branco katak lampu sinais tranzitu la funsiona ho diak tanba politika hari sentral eletriku la liu husi prosesu normal.
“Tuir lolos liu husi estudu nebe klean, luan, tasak tiha lai mak ita foin avansa halo projetu maibe nia prosedur la halo hanesan ne’e,” Deputado Branco kestiona.
Tuir Depudato Branco lampu sira ne’e halo antes kedas mas impaktu husi eletrisidade mak sai hanesan ne’e.
“Tenki halo funsionamentu [ahi] 24 oras atu nune’e sinais tranzitu sira funsiona normal no la bele provoka asidente trafiku,” nia tenik.
Deputado Branco dehan tuir estatistika tranzitu nian loron ida ema nain hat hetan dezastre, no dun ba sinais tranzitu la funsiona e ne’e kulpa governu nian tanba ahi lakan mate.
