Tuir Konstituisaun Republika Demokratika Timor-Leste (RDTL) sidadaun hotu inklui mos membru Polisia Nasional Timor-Leste (PNTL) no Forsa Defeza Timor-Leste (F-FDTL) iha direitu no obrigasaun tuir eleisaun, tanba ne’e Fundasaun Mahein (FM) sujere atu membru PNTL sira tenke vota uluk antes loron eleisaun nian nune’e bele halo seguransa ba iha eleisaun.
“Nune’e polisia sira bele halo seguransa ba iha elisaun prezidensial, la’o ho diak no efetive,” dehan Diretor FM, Nelson Belo semana kotuk iha Balide Dili.
Hatan ba kestaun ne’e II Komandante PNTL Superintendente Afonso de Jesus dehan, sidadaun hotu iha tratamentu ne’ebe hanesan inklui mos membru PNTL sira hodi tuir eleisaun.
“Hotu-hotu ba tau hamutuk iha ne’eba, laiha ketak-ketak. Tuir saida mak hau hatene iha eleisaun 2007 polisia sira nebe maka halo siguransa iha centru de votasaun sira ne’e maka ema fo prioridade uluk atu ba vota, e depois sira hotu tia maka ema seluk, depois sira ba halo seguransa fali, ne’e tuir saida maka hau hatene,” dehan Komandante de Jesus.
Tanba ne’e tuir nia, prosesu votasaun membru PNTL iha tinan ida ne’e mos sei hanesan ho tinan hitak liu ba.
Entertantu tuir Deputadu Duarte Nunes katak atu vota uluk ka ikus hanesan deit, no sira bele mantein seguransa iha loron eleisaun.
“Laiha problema wainhira PNTL ba vota iha centru votasaun nebe maka sira halo siguransa ba, wainhira povu vota hotu tiha ona sira bele ba vota, hau hanoin ida ne’e sempre la’o iha eleisaun tinan hirak liu ba, nebe hau hanoin laiha problema,” Deputado Nunes dehan.
