Tuir Jestor SJDO, Jacinto Ximenes, hateten objetivu kursu ne’e oinsa juventude sira dezenvolve sira nia skill atu aprende liu tan sistema komputador no progrma ne’e sei halai liu ba joven sira ne’ebé remata ona eskola, maibe la taka dalan mos ba estudantes sira ne’ebé maka iha interese atu tuir maske sei eskola hela.
Nia hatuta katak kursu ida ne’e la’os gratuitu, maibe partisipante sira kontribui deit $10 hodi asegura manutensaun ba ekipamentu ne’ebe Sekretaria Estadu Juventu no Desportu (SEJD), atu garante sentru hanoin ho ekipamentu ne’ebe diak nafatin.
“Kursu ne’ebé ami loke iha Oe-Cusse tuir lolos la selu ida maibe ami hakarak hetan kontribuisaun husi foinsae sira atu bele garantia sustentabilidade no manutesan ba kumputador, hola mina ba gerador no nesesidade importante seluk. Ne’e maka partsipantes sei selu $10 ba estudante, enkuantu ba funsionario publiko sei kontribui $20 kada programa,” hateten Jestor Ximenes.
Entertantu treinador Adalbertu Elo hateten katak treinamentu ne’e halai liu ba juventudi, estudantes no fungsionario ne’ebé maka hakarak aumenta sira nia konhesimentu oinsa bele uza komputador.
“Ami nia programa ida ne’e oferese ba entidade hotu hanesan joventudi, eskola oan sira no ita nia fungsionario sira ne’ebé iha interese hodi aumenta sira nia pengelaman ba komputador, tamba oras ne’e dadaun aktividade iha kantor sira ne’e uza hotu komputador entaun sira tenke hatene,” Trainador Elo hateten.
Treinador Elo informa tan katak Formasaun Kursu Komputador hanorin aplikasaun Microsoft Word ho Microsoft Excel ba durasaun fulan rua no kuntunua tan ho program sira seluk ne’ebe ligado ho sistema komputador.
“Kursu Programa rua Microsoft Word ho Microsoft Excel sei sai pakote ida ba estudantes sira. Ho razaun waihira sira atu pratika iha kantor ruma la bele hasoru difikuldade hanesan haruka ketik no halo tablet hodi kalkulasaun maka la hatene, ema sei lakon fiar ho sira nia treinamentu.”
