Relasiona ho estrada ponte kais nebe kompania halo la iha kualidade, Prezidente Parlamentu Nasional (PN), Fernando Lassama de Araujo, sente moe tanba Estrada ne’e halo ho teknolojia no ho ekipamentus ne’ebe iha kualidade diak maibe nia durasaun la naruk, iha tempu bai udan no bai loron kuak hela deit.
“Ema mesak enjinheiru ho ekipamentu ne’ebe kualidade, tinan bai loron halo semana ida aat fali, loron rua, loron tolu aat fali, hanesan prezidenti parlamentu hau moe,” hateten Prezidente Parlamentu Lasama de Araujo, semana kotuk (30/01).
Entertantu Deputado David Dias Ximenes hateten estrada ne’e at fali ona tanba be nalihun deit iha estrada leten halo estrada ne’e aumenta aat ba bebeik.
“Estrada ida ponte kais nia oin ne’e horseik, horbainrua, hau koalia mas agora kuak fali ona,” nia katak.
Tanba ne’e nia sujere ba meja Parlamentu Nasional atu bolu kompanhia nebe responsabilidade ba estrada ne’e atu mai halo esplikasaun iha parlamentu.
“Neba la’os sira halo deit maibe neba ne’e sira gasta osan, iha ne’e hau nia ibun lulik hau lakohi dehan AMP mak halo maibe ema halo buat ne’eba ne’e mak la iha responsabilidade,” nia dehan.
Tuir observasaun husi membru parlamentu Komisaun B, Deputado Ximenes nota katak reabilitasaun estrada Ponte Kais nian nebe mak kompania halo la iha kualidade tanba horas ne’e dadauk aat fali ona.
Alende ne’e Deputado Komisaun G, nebe mak trata asuntu Infrastrutura nian, Mateus de Jesusu, hatateten, dala barak Komisaun G hato’o bebeik ba Diresaun Obras Publika ninian oinsa bele tau atensaun ba estrada neba.
“Parte Governu ninian sempre fo programa halo reabilitasaun ba estrada, mas konaba nebe mak halo estrada ne’e mak uza alkatraun at ninian, tau ba fulan ida fulan rua nakloke ona,” Deputado Mateus dehan.
Iha parte seluk halo estrada ponte kais ne’e at bebeik tanba kareta nebe tula sasan todan liu, liu husi ponte kais fo impaktu ba estrada halo estrada aat ba bebeik.
“Ita bele hirus ba Diresaun Obras Publiku ninian maibe dalaruma mos transporte lao ba mai lori sasan todan tama sai iha neba sempre fo ninia impaktu ba estrada ne’e,” katak Deputado Mateus tan.
