Ministru Educasaun (ME), liu hosi Ministru ME, Dr. João Cancio Freitas, semana kotuk inaugura Escola Referensia Oé-Cusse (ERO) iha Palaban, Sucu Costa, Sub-Distritu Pantemakasar, Distritu Oe-cusse no hateten katak Timor-Leste presiza duni Escola Referensia atu koko aumenta kualidade edukasaun iha rai laran.
“Ohin loron ita sei presiza Escola Referensia tamba ita nia kualidade seidauk. Tinan sanulu oin mai escola sira ne’e sei la hanaran ona referensia. Bainhira ita nia escola iha kondisaun hanesan, hanorin ho padraun ne’ebé hanesan,’’ Ministru Freitas hateten.
Ministro Freitas hatutan tan katak oras ne’e iha rai laran loke tiha ona Escola Referensia lima no nia kurikulum sei lao tuir Portugal nian no tuir padraun Internasional ne’ebé iha kualidade diak tebes.
“[Hau] mai iha ne’e atu halo inagurasaun ba escola ne’e. Eskola Referensia lima seluk iha Ermera, Same, Baucau, Maliana, no ohin loron iha Oé-Cusse; ne’ebé nia padraun hanesan Eskola Rerensia iha Dili ne’eba. Escola sira ne’e tuir Padraun Internasional, padraun ida ne’e importante tebes. Tuir planu sei loke tan iha Distritu hotu,” hateten Ministru Freitas.
Entretantu Ministru da Educasaun e da Seinsia, Portugal nian, Dr. Nunu Crato hateten katak Governu Portugal iha komitmentu makas atu ajuda nafatin Timor-Leste iha Sektor Educasaun.
“Tan ne’e maka foin lalais ami asina akordo ho Governo Timor-Leste nudar fator importante atu hanorin lingua Portuguesa iha Universidade sira iha Timor-Leste, tamba oras ne’e dadun kursu barak la hanorin lingua Portugés,’’ hateten Minitro Crato.
Iha parte seluk Secretario Estado Regiaun Oé-Cusse (SERAO), Jorge Da Conceição Teme, hateten katak Educasaun maka hanesan xave ba dezenvolvementu Timor-Leste no katak liu husi formasaun Rekursu Humanus ho kualidade diak edukasaun maka bele eksplora riku soin Timor-Lest.
SE SERÃO Teme lori naran povu Oé-Cusse nia hato’o mos agradesimentu ba governo Portugal tamba bele ajuda harie Escola Referensia iha enklave.
“Hau lori povu Atoni nia naran hato’o obrigado ba Estadu Portugal ne’ebé maka iha komitmentu makas atu estabelese Eskola Referal ida iha Oé-Cusse ne’ebé maka ohin loron hetan inagurasaun. Eskola ne’e sei fo benefisio ba povu Oé-Cusse nia Oan sira hodi eskola ba,” SE Teme hateten.
Total orsmantu ne’ebé uza ba rehabilitasaun Escola Referensia Oé-Cusse hosi Orsamentu Jeral Estadu 2011 ho montante osan Dolar Amerikanu 190 mil.
