Atu prevene kazu mal nutrisaun aumenta no garante nutrisaun diak ba ema hotu iha rai laran, organizasaun Hiam Health (HH), loke oportunidade ba komunidade sira ne’ebe iha interese atu tuir treinamentu kona ba ‘community garden no family garden’ (toos komunitario no toos familia) atu oinsa mak uza rai mamuk ne’ebe iha hodi kuda aihoris ne’ebe iha nutrisaun diak ba familia liu-liu ba labarik sira.
“Agora ami iha projetu foun ne’ebe hanaran To’os Komunidade ne’e ami ba koalia ho lideransa komunitaria sira atu identifika sira nia joventude ou komunidade hamutuk nain 15 atu mai tuir treinamentu iha Hiam Health durante loron lima. No ba Family Garden [To’os Familia] ne’e ba familia sira ne’ebe hela iha sentru rehabilitasaun atu aprende teoria no pratika direitamente iha ami nia to’os tanba ami fokus ne’e halai liu ba edukasaun katak atu eduka ema hodi kumpriende diak liu tan kona ba balansu nutrisaun nian hodi bele prevene mal nutrisaun,” dehan Diretora Hiam Health, Rosaria Martins da Cruz, semana kotuk (27/1), iha Comoro Dili.
Hiam Health nudar organizasaun ida ne’ebe durante ne’e luta hodi promove oinsa atu prevene mal nutrisaun liu husi treinamentu ba komunidade sira oinsa mak bele uza rai mamuk hodi kuda aihoris ne’ebe iha nutrisaun.
Tuir Diretora da Cruz, iha treinamentu ne’e partisipante sira sei aprende kona ba oinsa atu uza rai hodi bele kuda aihan ne’ebe iha valor nutrisaun diak nune’e bainhira sira fila ba distritu, sira bele forma grupu hodi bele implementa programa ne’e ba sira nia komunidade.
Diretora ne’e hatutan HH sei fo apoiu material hodi bele implementa mos to’os familia liu–liu sira ne’ebe hela iha sentru rehabilitasaun bainhira fila ba distritu. HH sei fo kontribuisaun atu dezenhu ba to’os nain tuir sistema permakultura nian nune’e sira nia to’os sai permanente kedan.
Nia haktuir katak toos komunidade no toos familia ne’e iha diferente tanba toos komunidade ne’e ba komunidade sira katak no to’os ne’ebe luan; no family garden (to’os uma hun) ne’e focus ba familia sira ne’ebe nia oan ho kondisaun malnutrisaun ne’ebe hela iha sentru rehabilitasaun durante sira hela iha centru sira mos hetan treinamentu atu komprende kona ba valor aihan liu husi edukasaun tanba sira hela kleur depende ba kondisaun labarik nian.
Iha lidun seluk Matilda Amaral, partisipante ba treinamentu ne’e, sente kontente tebes tanba durante hela iha Sentru Rehabilitasaun HH ne’e la’os hela deit maibe sira mos hetan informasaun barak konaba valor aihan no oinsa atu uza toos iha uma hun ka toos familia hodi kuda aihoris ne’ebe fo nutrisaun diak ba familia.
“Ami sente kontente tebes tanba durante ami hela iha Sentru Rehabilitasaun ami laos aprende tein aihan nutrisaun deit maibe ami mos aprende oinsa atu uza to’os uma hun hodi kuda aihoris ne’ebe fo nutrisaun diak ba ami nia familia,” Partisipante Amaral dehan.
Iha oportundiade ne’e mos Diretora HH informa katak durante ne’e HH seidauk hetan supporta ruma husi ministerio kompetente hanesan Ministerio Saúde no Agrikultura maske HH durante ne’e luta ba kondisaun labarik Timoroan maibe ema internasional mak fo suporta fali.
