Tuir membru Parlamentu Nasional (PN), Deputado Francisco de Araujo, Komisaun F, ne’ebe toma asuntu kona ba Educasaun, Saude no Cultura, distribuisaun meza-kadeira husi Ministeriu Edukasaun (ME) ne’ebe atrazadu obriga estudante sira tenke tur iha rai hodi tuir prosesu aprendijazen.
“Ba hau ida ne’e mak problema ne’ebe to’o agora seidauk rezolve e sira hakarak atu implementa fali projetu pilotu lian materna ne’e,” hateten Deputadu De Araujo, semana kotuk (31/01) iha Parlamentu Nasional, Dili.
Tuir nia, total orsamentu ne’ebe preve ba ME hamutuk US$ 15 milhoens hodi halo infraestrutura eskola nian, sosa meza-kadeira, no livrus sira ba profesores.
“Maibe to’o agora ami hare seidauk halo eskola ida, meja-kadeira laiha iha eskola sira no laiha livrus ba profesores sira,” nia kestiona.
Entertantu Deputadu Aderitu Hugo da Costa, preokupa ho kondisauhn eskola sira husi ensino baziku to’o ensino sekundaria iha teritoriu tomak ne’ebe la seguru.
“Hau bele dehan katak ita bele hare ona problemas menus meza kadeira akontese tanba meza ho kadeira sira ne’e tau iha sala ne’ebe laiha odamatan, laiha janela, bainhira komunidade no ema ne’ebe presiza iha situasaun ruma sira bele ba foti iha escola ne’e,” preokupa Deputado Da Costa.
Tuir nia, bele sosa materia foun maibe ministeriu kompetente tenke monta uluk seguransa iha eskola sira ne’e.
Iha parte seluk Secretariu Jeral Sindikatu Professores Timor-Leste (SPTL), Francisco da Conceicão da Silva, hateten kona ba kestaun ne’e ema hotu inklui governu, Parlamentu no mos komunidade sira tenke servisu hamutuk.
“Maibe materias ne’ebe ministerio distribui ba escola sira ne’e to’o iha ne’eba ka lae, tuir ninia kuantidade ne’ebe haruka ba ka lae, ida ne’e mak sei nafatin hanesan preokupasaun,” nia dehan.
