Eskola barak mak remata ona rehabilitasaun maibe kompania seidauk entrega ba parte eskola nian e ida ne’e difikulta prosesu aprendizajen ba estudante no professores sira.
“Tenki hare tim ida husi Ministerio Educasaun [ME] tun ba hare iha baze no reverifika fali projetu ne’ebe hotu ona tenki entrega ba Ministerio Educasaun tamba ne’e resposablidade sira nian, kuandu projetu hotu tiha mak la entrega ba ministerio ne’e la’os sala sira nian,” dehan Deputado Francisco de Araujo,semana kotuk (31/01), iha Parlamento Nasional, Dili.
Deputadu ne’e hatutan ME tenki buka hatene tanba saida mak escola ne’e pronto ona maibe seidauk entrega. “Sei falta saida, falta mobilario ka falta orsamentu husi Governo seidauk selu.”
Iha parte seluk Secretariu Jeral Sindikatu Professores Timor-Leste (SPTL) Francisco da Conceicão da Silva hateten projetu rehabilitasaun ba eskola sira iha Dili hanesan eskola terseiru siklu ka Pre-sekundariu 30 de Agostu , 12 de Novembru, 04 de Setembru Unamet Balide, no mos eskola 10 Dezembru Comoro, rehabilitasaun hotu ona maibe to’o agora seidauk entrega xavi ba escola.
“Hau hanoin proseu projetu normal ne’ebe oinsa mak atu bele hare kualidade servisu ba kompania sira ne’ebe kaer projetu hirak ne’ebe iha,” Secretariu SPTL da Silva dehan.
Tuir nia, edifisiu escola sira ne’e mak la entrega, automatikamente professores sira labele fo materia kompletu ba estudante sira.
“Materia abandonadu, estudante sira ne’ebe professores sira halo pasa ba segundu ano no pasa ba terseiro ano inkui sira ne’ebe akaba husi ensino refere automatikamente ba oin nia labele halo buat ida,” nia preokupa.
