Programa Hanorin no Aprendizajen ho lian Portugues sei aplika iha 2012 ba Universidade Nasional Timor Loro Sa’e (UNTL) deit tanba ba Universidade Privadu sira iha rai laran sei hare ba sira nia kondisaun Rekursu Humano ne’ebe iha tiha mak bele implementa mos programa ne’e.
“Tamba ida ne’e mos koresponde estudante UNTL sira mai halo tes mos sira hatudu katak bele no mos Dosente barak ne’ebe hanorin iha UNTL barak mak hetan Graduasaun husi nasaun Brazil no Portugal,” hateten Xefe Departamentu Lisensiamentu no Akreditasaun Universitario, Vasco Viana, semana kotuk (20/1), iha nia knar fatin Ministerio Educasaun (ME), iha Vila Verde, Dili.
Tuir Xefe Departamentu Viana katak tuir Politika ME nian hakarak atu hanorin uluk ba Universidade Nasioal UNTL no ba Universidade Privadu ka sira ne’ebe seidauk hetan akreditasaun sei hare ba sira nia kondisaun universidade nian liu-liu hare ba rekursu humano ne’ebe instituisaun hira ne’e iha.
Tuir Konstituisaun RDTL iha lingua hat mak konsagra tiha ona Lingua Tetun no Portugues hanesan lian ofisial no Lingua English ho Indonesia uza hanesan lian trabalho deit.
Iha parte seluk Vise Reitor IV Universidade Da Paz (UNPAZ), Asuntu Publiko, Jose Agostinho Monis, hateten katak universidade privado ne’e laos hanorin lingua maibe hanorin siensia.
“Ita nia Konstituisaun iha lingua hat, ami uza kualker lingua ida ne’ebe bele transfere ba estudante sira para bele simu [matenek] ida deit mak ami nia hakarak,” hateten Vise Reitor IV, UNPAZ, Monis.
Nia haktuir tan katak UNPAZ sei iha preparasaun minimo kona ba lingua Portugues tamba Timor-Leste foin ukun tinan 11 laran maibe hare katak lingua Portugues ne’e hanorin ba estudante husi Ensino baziko to’o secudario ne’e lingua merkadu nian deit laos lingua akademika.
“Hau bele hateten lingua merkadu nian tamba material ne’ebe professores sira hanorin ne’e han no hemu nian deit e lingua ne’e mos laiha nia kosa kata ne’e susar tebes. Formasaun ne’ebe Ministerio Educasaun fo ne’e laos lingua academika nian maibe lingua mercadu nian,” hateten tan Vise Reitor IV Monis.
