Relasiona ho data elisaun ne’ebe Presidente da Republika, Jose Ramos-Horta, publika sai ona katak sei mono iha loron 17 Marsu 2012, Polisia Nasioanl Timor-Leste (PNTL) iha Distritu Viqueque optimista katal Distritu Viqueque sei sai ezemplo diak ba distritu seluk tanba agora dadaun polisia distritu Viqueque preparadu ona maske ho fasilidade ne’ebe limitadu maibe prontu atu garante seguransa durante Elisaun Presidensial no Parlamentar iha sira nia rejiaun.
“Ami sempre dehan katak ami prontu garante situasaun seguransa iha Distritu Viqueque tanba komandu distritu Viqueque iha hanoin antes elisaun geral ami halo konsolidasaun no sosializasaun ho lideransa partidu politiku, Sosiedade sivil, Joventude no departamentu hotu atu
fo seguransa ne’ebe masimu ba Distritu Viqueque. Ami lakohi akontese tan problema hanesan elisaun geral tinan 2007 ne’ebe ita hotu la espera, maibe tinan agora ami espera katak Distritu Viqueque sei sai ezemplu diak ba distritu hotu-hotu no sei la akontese buat ida,” dehan Komadante PNTL Distritu Viqueque, Justinu Menezes, duraten serimonia inagurasaun Eskola Filial Uailalika Sub- distritu Uatolari, Distritu Viqueque.
Komandante Menezes hatutan katak problema ne’ebe akontese iha Distritu Viqueque mak problema asaltu individual mak barak liu. Maske nune situasaun agora dadaun iha Distritu Viqueque lao normal laiha buat ruma no tanba agora dadaun polisia halo hela patroli atu taka organizasaun artemarsiais no jogu bola gulin ne’ebe durante ne’e sai provokator ba problema.
“Jogu ne’ebe agora dadaun sei loke mak futu manu deit ho programa governu nian taka organizasaun artemarsiais no jogu bola gulin halo situasaun sai diak liu tan so problema ne’ebe agora dadaun iha mak problema violensia domestika.”
Polisia Distritu Viqueque hamutuk 137 ne’ebe sufisente atu fo seguransa ba elisaun geral iha sub-distritu sira, polisia Distritu Viqueque la satisfeitu ho sistema distribuisaun mina konbostivel tanba distribuisaun la direitamente ba komandante geral sira maibe tenke liu husi kompania.
“Bainhira polisia atu ba atende kazu urjente ruma maibe mina laiha ne’e mak sai prekupasaun bo’ot ne’ebe polisia Distritu Viqueque infrenta.”
Alende distribuisaun mina sira mos falta rekursu materiais hanesan transporte no radio komunikasaun maibe Komandante Menezes garante katak nia ajentes sei la abandona sira nia servisu no kontinua lao diak.
Iha lidun seluk, Chefe Suku Afaloicai, Constantinho Guterres, garante katak iha suku Afaloicai sei la akontese buat ruma no elisaun geral sei lao normal tanba sira halo ona koperasaun diak ho parte polisia no joventude iha bairo laran.
“Hau koalia liu-liu ba hau nia suku hau fiar katak sei lao ho diak tanba ami sei kopera nafatin ho polisia nasional Distritu Viqueque no joventude sira ne’ebe ami preparadu ona atu nu’ne bele garantia seguransa iha elisaun geral labele akontese tan problema ne’ebe ita hotu la espera ida ne’e mak ami sei halo no ami sei kopera hamutuk ho polisia sira,” dehan Chefe Suku Guterres.
