Hafoin remata fiskalizasaun hosi membru Komisaun F, Parlamento Nasional, hosi Watulari ba Makadiqui, Distrituti Viqueque, hetan problemas iha dalan wainhira komunidade balun Macadiqui tesi ai no taka estrada hodi halo kobransa ba transportes ne’ebe liu no Polisia Nasional Timor-Leste (PNTL) makes iha la halo atuasaun ba komunidade sira ne’e.
“Komunidade sira tesi tiha ai tau netik tiha ba estrada, sira mak halo fali kobransa,” hateten Deputada Komisaun F, Tereja Maria de Carvalho, iha Parlamentu Nasional, semana kotuk (25/1).
Deputada Carvalho hateten iha momentu ne’eba Polisia iha hela maibe sira la halo atuasaun ba hahalok ba komunidade sira ne’e.
“Hanesan hau bele selu osan mas kareta ne’ebe halai buka osan nia fo tan dolar sanulu kaer kareta, depois nia hetan saida,” Deputada Carvalho tenik tan.
Tuir Deputada ne’e mos katak situasaun la os komunidade halo kobransa tanba ai ruma tohar monu ba iha estrada mak sira ajuda hasain, situasaun ne’ebe komunidade balun mak tesi ai rasik atu taka rai hosi sira bele halao kobransa illegal ba motoristas.
“Polisia iha subar, mas komunidade husu osan Polisia la halo buat ida.”
Entertantu Prezidenti Parlamentu Nasional, Deputado Fernando Lasama de Araujo, sujere ba tekniku sira halo relatoriu ida hodi hato’o ba ministeriu kompetente atu toma atensaun ba hahalok ne’e.
“Tekniku sira halo relatoriu ida, Deputada Tereja bele asina hato’o ba nia bo’ot sira para atu tau atensaun selae nunka sai,” hateten President PN Lasama.
